ᑭᓇ ᓂᕈᐊᒐᒃᓴᐅᔪᖕᓇᖅᐸ?

ᓂᕈᐊᒐᒃᓴᖅ ᐃᓅᔪᖅ ᓂᕈᐊᒐᒃᓴᐅᓇᓱᒃᑐᖅ ᓂᕈᐊᖅᑎᑦᑎᓂᕐᒥᑦ. ᓂᕈᐊᒐᒃᓴᖅ ᓂᕈᐊᖅᑕᐅᕐᓗᐊᓛᖑᔪᖅ ᑭᒡᒐᖅᑐᖅᑕᐅᕝᕕᖕᒥᑦ (ᓂᕈᐊᖅᑎᑦᑎᓂᖃᕐᕕᐅᔪᖅ) ᒪᓕᒐᓕᐅᕐᕕᖕᒧᑦ ᒪᓕᒐᓕᐅᖅᑎᙳᖃᑦᑕᖅᑐᖅ ᑕᐃᑉᓱᒧᙵ ᑭᒡᒐᖅᑐᖅᑕᐅᕝᕕᖕᒧᑦ.

ᑭᓇ ᓂᕈᐊᒐᒃᓴᐅᔪᖕᓇᖅᐸ?

ᓂᕈᐊᕐᓂᖅ ᐊᔪᙱᒃᑯᕕᑦ, ᓂᕈᐊᒐᒃᓴᐅᔪᖕᓇᖅᑐᑎᑦ.

ᑭᒡᒐᖅᑐᖅᑕᐅᕝᕕᖕᒧᑦ ᒪᓕᒐᐃᑦ

ᓂᕈᐊᒐᒃᓴᐅᔪᖕᓇᖅᑐᑎᑦ ᓇᓂᑐᐃᓐᓇᖅ ᓄᓇᕗᒻᒥᑦ ᑭᒡᒐᖅᑐᖅᑕᐅᕝᕕᖕᒥᑦ, ᐊᖏᕐᕋᖃᕐᕕᒋᔭᕐᓂᑐᐃᓐᓇᐅᖏᑦᑐᖅ.ᑭᓯᐊᓂ, ᓂᕈᐊᒐᒃᓴᐅᔪᖕᓇᖅᑐᑎᑦ ᐊᑕᐅᓯᑐᐃᓐᓇᕐᒥᑦ ᑭᒡᒐᖅᑐᖅᑕᐅᕝᕕᖕᒥᑦ ᓂᕈᐊᖅᑎᑦᑎᓂᕐᒥᑦ.

ᐱᓕᕆᕝᕕᐅᔪᑦ ᒪᓕᒐᖏᑦ

ᖃᐅᔨᒋᐊᕐᕕᒋᓗᒋᑦ ᐱᓕᕆᕝᕕᒋᔭᑎᑦ! ᐃᓚᖏᑦ ᐱᓕᕆᕝᕕᐅᔪᑦ ᒪᓕᒐᖃᖅᑐᑦ ᐱᓕᕆᔨᖏᓐᓄᑦ ᓂᕈᐊᒐᒃᓴᐅᔪᓄᑦ. ᐆᒃᑑᑎᒋᓗᒍ, ᐱᓕᕆᐊᖕᓂᑦ ᓄᖅᑲᖓᑐᐃᓐᓇᕆᐊᖃᖅᑐᑎᑦ ᓂᕈᐊᖅᑎᑦᑎᓂᐅᑎᓪᓗᒍ.

ᐊᔪᖅᑎᑕᐅᓃᑦ ᓂᕈᐊᒐᒃᓴᐅᔪᖕᓇᕐᓂᕐᒧᑦ

ᐊᔾᔨᐅᖏᑦᑐᓂᒃ ᐊᔪᖅᑎᑕᐅᓂᖅᑕᖃᖅᑐᖅ ᓂᕈᐊᒐᒃᓴᐅᓂᕐᒧᑦ. ᓂᕈᐊᒐᒃᓴᐅᓂᖅ ᐊᔪᖅᑐᑎᑦ ᐃᒪᓐᓇᐃᒃᑯᕕᑦ:

  • ᐱᓕᕆᔨᐅᒍᕕᑦ ᓄᓇᕗᒻᒥ ᓂᕈᐊᖅᑐᓕᕆᔨᒃᑯᓐᓄᑦ;
  • ᐱᓕᕆᔨᐅᒍᕕᑦ ᓄᓇᕗᑦ ᒐᕙᒪᒃᑯᓐᓄᑦ ᐱᓕᕆᐊᖕᓂᑦ ᓄᖅᑲᙱᒃᑯᕕᑦ;
  • ᒪᓕᒐᓕᐅᖅᑎᐅᒍᕕᑦ ᑲᓇᑕᐅᑉ ᒪᓕᒐᓕᐅᕐᕕᖓᓄᑦ, ᓴᓇᑑᒍᕕᑦ, ᐅᕝᕙᓘᓐᓃᑦ ᒪᓕᒐᓕᐅᕐᕕᖕᒧᑦ ᐊᓯᐊᓂᑦ ᐅᑭᐅᖅᑕᖅᑐᒥᑦ ᐊᕕᒃᑐᖅᓯᒪᔪᖏᓐᓂᑦ ᐅᕝᕙᓘᓐᓃᑦ ᑲᓇᑕᐅᑉ ᐊᕕᒃᑐᖅᓯᒪᔪᖏᓐᓂᑦ;
  • ᐃᖅᑲᖅᑐᐃᔨᐅᒍᕕᑦ (ᑭᓯᐊᓂ ᐃᓄᓕᕆᓂᕐᒧᑦ ᐃᖅᑲᖅᑐᐃᔨᐅᒍᕕᑦ ᐊᔪᙱᑦᑐᖅ);
  • ᐃᓄᒃ ᑎᒍᔭᐅᓯᒪᔪᖅ ᑎᒍᔭᐅᓯᒪᓂᐊᖅᖢᓂᓗ ᓱᓕ ᓂᕈᐊᕐᓇᐅᑉ ᐅᑉᓗᖓ ᐊᓂᒍᖅᑎᓪᓗᒍ;
  • ᐃᓄᒃ ᒪᓕᓚᐅᖏᑦᑐᖅ ᒪᓕᒋᐊᖃᕐᓂᕐᒧᑦ ᐊᖏᖃᑎᒌᒍᑎᒥᒃ ᑭᖑᓪᓕᖅᐹᕐᒥᑦ ᓂᕈᐊᖅᑎᑦᑎᓂᕐᒥᒃ ᐱᔪᒥᒃ; ᐅᕝᕙᓘᓐᓃᑦ,
  • ᑮᓇᐅᔭᓕᕆᔨᐅᓚᐅᖅᑐᖅ ᓂᕈᐊᒐᒃᓴᐅᓚᐅᖅᑐᕐᓘᓐᓃᑦ ᑭᖑᓪᓕᖅᐹᕐᒥᑦ ᓂᕈᐊᖅᑎᑦᑎᓂᕐᒥᑦ ᑐᓂᐅᑎᖃᙱᖦᖢᓂᓗ ᑮᓇᐅᔭᐃᑦ ᒥᒃᓵᓄᑦ ᐅᓂᑉᑳᑦ ᐅᑎᖅᑎᑦᑕᕆᐊᓕᖏᓂᒃ ᑭᖑᕙᙱᓪᓗᑎᒃ.

ᒪᓕᒐᓕᐅᖅᑎ ᒪᓕᒐᓕᐅᕐᕕᖕᒧᑦ ᐃᓂᒥᓂᒃ ᓄᖅᑲᕈᖕᓇᖅᑐᖅ ᐸᓯᔭᒃᓴᙳᕐᒪᑦ ᐸᓯᔭᐅᖕᒪᓪᓘᓐᓃᑦ ᐱᕋᔭᖕᓂᕐᒧᑦ ᒪᓕᒃᖢᒋᑦ ᓄᓇᕗᑦ ᑲᓇᑕᐅᑉᓘᓐᓃᑦ ᒪᓕᒐᖏᑦ. ᐃᓄᒃ ᓂᕈᐊᒃᓴᙳᒃᑲᓐᓂᕈᖕᓇᖅᑐᖅ ᑭᓯᐊᓂ ᑕᓪᓕᒪᐃᑦ ᐅᑭᐅᑦ ᑭᒡᒐᖅᑐᖅᑕᐅᕝᕕᒃ ᓂᕈᐊᖅᑳᖅᑎᓪᓗᒍ ᐊᓯᐊᓂᒃ ᐃᓇᖏᖅᑎᒋᓂᐊᖅᑕᖓᓂᒃ.

ᐅᓇ ᓇᕿᓪᓗᒍ ᑕᑯᔪᒪᒍᕕᑦ ᑎᑎᕋᖅᓯᒪᔪᓂᒃ ᐃᓄᖕᓂᒃ ᒫᓐᓇᐅᔪᖅ ᓂᕈᐊᒐᒃᓴᐅᓂᖅ ᐊᔪᓕᖅᑎᑕᐅᓯᒪᔪᓂᒃ.