ᓂᕈᐊᖅᑐᓕᕆᓂᕐᒨᖓᔪᑦ

ᓄᓇᕗᒻᒥ ᓂᕈᐊᕐᒃᑐᓕᕆᓂᕐᒧᑦ ᐱᖁᔭᖅ ᒪᓕᒐᐅᔪᕐᒃ ᒪᓕᒃᑕᐅᕙᒃᑐᕐᒃ ᓂᕈᐊᕐᓂᖃᕐᓂᐊᕐᒃᑎᓪᓗᑕ ᒪᓕᒐᓕᐅᕐᒃᑎᐅᓂᐊᕐᒃᑐᓂᒃ ᓄᓇᕗᑦ ᒪᓕᒐᓕᐅᕐᕕᖓᓂᑦ. ᓄᓇᕗᒥᐅᑦ ᐱᔪᖕᓇᐅᑎᖃᕐᒪᑕ ᓂᕈᐊᕈᖕᓇᕐᓂᕐᒥᑦ ᐊᒻᒪᓗ ᐃᑲᔪᕈᖕᓇᕐᒃᖢᑎᒃ ᐃᓱᒪᓕᐅᕆᓂᕐᒥᒃ ᑭᑐᑦ ᓄᓇᕗᒻᒥ ᒐᕙᒪᒋᔭᐅᓂᐊᕐᒪᖔᑕ.

ᐱᔾᔪᑕᐅᔪᑦ ᓄᓇᕗᒻᒥ ᓂᕈᐊᕐᒃᑐᓕᕆᓂᕐᒧᑦ ᐱᖁᔭᐃᑦ ᐃᒪᓐᓇᐃᑐᒪᓂᕐᒧᑦ:

  • ᐱᔪᒪᓂᖃᕐᒃᑎᑉᐹᓕᖁᑉᓗᒋᑦ ᐃᓄᐃᑦ ᓂᕈᐊᖃᑕᐅᓂᕐᒧᑦ.
  • ᓂᕈᐊᕐᒃᑎᓄᑦ ᐊᔪᕐᓇᙱᑦᑑᖁᒧᑦ ᓂᕈᐊᖃᑕᐅᓂᕐᒥᒃ ᐱᔪᒪᒍᑎᒃ.
  • ᑐᓗᕐᒃᑕᕈᑏᑦ ᐲᕐᓗᒋᑦ ᐃᓄᖕᓄᑦ ᓂᕈᐊᒐᒃᓴᙳᕈᒪᔪᓄᑦ.
  • ᐃᑲᔪᕐᓗᒋᑦ ᐃᓄᐃᑦ ᐅᔾᔨᕈᓱᒃᑲᓐᓂᕐᓂᕐᒥᒃ ᓂᕈᐊᕐᒃᑎᑎᓂᐅᔪᓂᒃ.
  • ᑎᑎᕋᕐᓗᒋᑦ ᐃᓄᖕᓄᑦ ᑐᕌᖓᔪᑦ ᑐᑭᓯᐅᒪᔾᔪᑏᑦ ᓄᓇᕗᒻᒥ ᐃᓕᑕᕆᔭᐅᓯᒪᔪᑦ ᐅᖁᐅᓯᓗᒃᑖᑦ ᐊᑐᕐᓗᒋᑦ.
  • ᐊᓯᖏᓐᓂᒃ ᐱᓕᕆᖃᑎᖃᖃᑦᑕᕐᓗᓂ − ᓲᕐᓗ ᐃᓄᖕᓂᒃ ᐊᐅᓚᑦᑎᖃᑦᑕᕐᒃᑐᓂᒃ ᐊᓯᖏᓐᓂᒃ ᓂᕈᐊᕐᒃᑎᑦᑎᓂᐅᔪᓂᒃ ᓄᓇᕗᒻᒥᑦ ᑐᑭᓯᐅᒪᔾᔪᑎᓂᒃ ᐊᑐᖃᑦᑕᖃᑎᒋᖃᑦᑕᕐᓗᒋᑦ, ᐃᓕᓐᓂᐊᖃᑎᒋᓗᒋᑦ, ᐃᓕᓐᓂᐊᕐᒃᑎᑦᑎᖃᑎᒋᓗᒋᑦ ᐱᓕᕆᔨᐅᔪᓂᒃ, ᐊᒻᒪᓗ ᓂᕈᐊᕐᒃᑎᑦᑎᓂᐅᔪᓂᒃ ᐱᔨᑦᑎᕋᐅᑎᓂᒃ ᐱᐅᓂᕐᒃᓴᓂᒃ ᓴᕿᑎᑦᑎᓗᑕ.
  • ᐊᐅᓚᑦᑎᓗᓂ ᐊᑑᑎᖃᑦᑎᐊᕐᒃᑐᒥᒃ, ᐋᕿᐅᒪᑦᑎᐊᕐᒃᑐᒥᒃ ᓂᕈᐊᕐᒃᑎᑦᑎᓂᐅᔪᒥᒃ.
  • ᐃᒃᐱᒍᓱᖕᓂᖃᑦᑎᐊᕐᓗᓂ ᓄᓇᒥᒃ, ᐅᖃᐅᓯᓂᒃ, ᐊᒻᒪᓗ ᐊᓯᖏᓐᓂᒃ ᐊᔾᔨᐅᖏᓐᓂᕆᔭᖓᓂᒃ ᓄᓇᕗᑦ.
  • ᕿᒥᕐᕈᓗᒍ ᓂᕈᐊᕐᒃᑐᓕᕆᓂᐅᑉ ᐱᕙᓪᓕᐊᓂᕆᔭᖓ ᓄᓇᕗᒻᒥᐅᓄᑦ ᐱᔪᒪᓂᕆᔭᐅᔪᑦ ᑎᑭᐅᑎᑦᑎᐊᕈᒪᑉᓗᒍ.

 

ᑭᑐᓗᒃᑖᓂᒃ ᓂᕈᐊᕐᒃᑎᑦᑎᓂᕐᒃ, ᑕᒪᐅᓇᒥᐊᕐᒃ ᓂᕈᐊᕐᒃᑎᑦᑎᓂᕐᒃ

ᑭᑐᓗᒃᑖᓂᒃ ᓂᕈᐊᕐᒃᑎᑦᑎᓂᕐᒃ

ᑭᑐᓗᒃᑖᓂᒃ ᓂᕈᐊᕐᒃᑎᑦᑎᓂᕐᒃᑕᖃᓲᕐᒃ ᓄᓇᕗᒻᒥᐅᓗᒃᑖᑦ ᓂᕈᐊᕆᐊᖃᕌᖓᑕ ᒪᓕᒐᓕᐅᕐᒃᑎᐅᓂᐊᕐᒃᑐᓂᒃ ᓄᓇᕗᑦ ᒪᓕᒐᓕᐅᕐᕕᖓᓐᓄᑦ. ᒪᓕᒐᓕᐅᕐᒃᑏᑦ ᓄᓇᕗᑦ ᒐᕙᒪᖓᓐᓂᑦ ᐱᙳᕐᒃᑎᑦᑎᖃᑦᑕᕐᒃᑐᑦ ᐊᒻᒪᓗ ᐱᖁᔭᓕᐅᕐᒃᐸᒃᖢᑎᒃ. ᑭᑐᓗᒃᑖᓂᒃ ᓂᕈᐊᕐᒃᑎᑦᑎᓂᖃᖃᑦᑕᕐᒃᑐᒍᑦ ᐅᑭᐅᑦ ᓯᑕᒪ ᐊᓂᒍᕌᖓᑕ ᓂᕈᐊᕐᓂᐊᕐᒃᖢᑕ ᒪᓕᒐᓕᐅᕐᒃᑎᒥᒃ ᐊᑐᓂ ᑭᒡᒐᕐᒃᑐᕐᒃᑕᐅᕝᕕᖕᓄᑦ. ᑕᒪᓗᒃᑖᖅ ᓄᓇᕗᒻᒥᐅᑦ ᓂᕈᐊᕐᒃᑏᑦ ᓂᕈᐊᖃᑕᐅᓂᕐᒃ ᐊᔪᖏᑦᑐᑦ ᓂᕈᐊᕈᖕᓇᕐᒃᑐᑦ ᑭᑐᓗᒃᑖᓂᒃ ᓂᕈᐊᕐᒃᑎᑦᑎᓂᐅᔪᒥᑦ.

ᑕᒪᐅᓇᒥᐊᕐᒃ ᓂᕈᐊᕐᒃᑎᑦᑎᓂᕐᒃ

ᑕᒪᐅᓇᒥᐊᕐᒃ ᓂᕈᐊᕐᒃᑎᑦᑎᓂᖃᓲᕐᒃ ᓂᕈᐊᖃᑕᐅᓂᖅ ᐊᔪᙱᑦᑐᑦ ᐊᑕᐅᓯᕐᒥᒃ ᑭᒡᒐᖅᑐᖅᑕᐅᕝᕕᖕᒥᑦ ᓂᕈᐊᕌᖓᑕ ᒪᓕᒐᓕᐅᕐᒃᑎᒥᒃ. ᑕᐃᒪᓐᓇᐃᖃᑦᑕᖅᑐᖅ ᒪᓕᒐᓕᐅᖅᑎᒥᒃ ᐱᓕᕆᐊᒥᓂᒃ ᓄᖃᕐᒃᑐᖃᕐᒃᐸᑦ ᑭᑐᓗᒃᑖᓂᒃ ᓂᕈᐊᕐᒃᑎᑦᑎᓂᕐᒃᑕᖃᕐᓂᐊᓵᕐᒃᑎᓪᓗᒍ. ᓂᕈᐊᕐᒃᑏᑦ ᑭᒡᒐᕐᒃᑐᕐᒃᑕᐅᕕᖕᒥᐅᑕᐅᔪᑦ ᓂᕈᐊᖃᑦᑕᕐᒃᑐᑦ ᓄᑖᒥᒃ ᒪᓕᒐᓕᐅᕐᒃᑎᐅᓂᐊᕐᒃᑐᒥᒃ ᑕᐃᑲᓂ ᑭᒡᒐᕐᒃᑐᕐᒃᑕᐅᕝᕕᖕᒥᑦ. ᓂᕈᐊᕐᒃᑏᑦ ᑭᒡᒐᕐᒃᑐᕐᒃᑕᐅᕝᕕᖕᒥᐅᑕᐅᔪᑦ ᑭᓯᒥ ᓂᕈᐊᖃᑦᑕᕐᒃᑐᑦ ᑕᒪᐅᓇᒥᐊᕐᒃ ᓂᕈᐊᕐᒃᑎᑦᑎᓂᐅᔪᒥᑦ.