ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖃᕈᑕᐅᓯᒪᓕᖅᑐᑦ

ᐅᕝᕙ ᓇᐃᑦᑐᖅ ᐅᔾᔨᕐᓇᖅᑐᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖃᕈᑕᐅᓯᒪᔪᑦ ᓄᓇᕗᒻᒥ.

ᒫᓐᓇᓵᖅ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖃᕈᑕᐅᓯᒪᔪᑦ

ᑕᒪᒃᑯᐊ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖃᕈᑕᐅᓚᐅᖅᑐᑦ ᒪᓕᒃᖢᒋᑦ ᓄᓇᕗᒻᒧᑦ ᓄᑖᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᕐᒧᑦ ᐱᖁᔭᖅ, ᐊᑐᓕᖅᑎᑕᐅᓚᐅᖅᑐᖅ ᔭᓄᐊᕆ 2014-ᒥᑦ.

ᑲᖏᖅᖠᓂᖅ ᐊᒻᒪᓗ ᐃᖃᓗᒃᑑᑦᑎᐊᖅ - ᐱᐊᓂᒃ ᐅᐊᐃᓂᓂᒡᓗ ᓂᐅᕕᕐᕕᒃᓴᐅᑉ ᒥᒃᓵᓄᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖅ (2017)
ᒪᐃ 2017-ᒥᑦ, ᒥᓂᔅᑕ ᑮᓇᐅᔭᓕᕆᔨᒃᑯᓐᓄᑦ ᓂᕈᐊᖅᑐᓕᕆᔨᒃᑯᑦ ᐊᖓᔪᖅᑳᖓᓐᓂᒃ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖃᖁᔨᓚᐅᖅᑐᖅ ᑲᖏᖅᖠᓂᕐᒥᑦ ᐊᒻᒪᓗ ᐃᖃᓗᒃᑑᑦᑎᐊᕐᒥᑦ ᐊᐱᕆᓗᑎᒃ ᓂᕈᐊᖅᑐᓂᒃ: “ᐃᑲᔪᖅᑐᐃᕕᑦ ᐱᐊᓂᒡᓗ ᐅᐊᐃᓂᓂᒡᓗ ᓂᐅᕕᕐᕕᖕᒥᑦ ᐅᒃᑯᐃᖅᓯᖁᔨᑉᓗᑎᑦ ᕼᐋᒻᓚᒋᔭᕐᓂᑦ?”  ᖃᓄᐃᖓᓂᐅᔪᑦ ᐊᑐᓕᖅᑎᑦᑎᓂᖃᕐᓂᐊᖏᖦᖢᑎᒃ, ᒐᕙᒪᒃᑯᑦ ᓂᕈᐊᕈᖕᓇᖅᑐᑦ ᒪᓕᖕᓂᐊᕐᒪᖔᔾᔫᒃ ᓂᕈᐊᕈᑕᐅᔪᓄᑦ ᖃᓄᐃᖓᓂᐅᔪᑦ.  ᑕᒪᕐᒥᒃ ᕼᐋᒻᓚᐅᔪᑦ ᓂᕈᐊᓚᐅᖅᑐᑦ “ᐄ”-ᒥᒃ.

ᓄᓇᓕᐅᑉ ᓄᓇᖏᓐᓄᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖅ (2016)
ᓂᕈᐊᖅᑏᑦ ᑕᒪᐃᓐᓂᓗᒃᑖᖅ ᓄᓇᕗᒻᒥ ᕼᐋᒻᓚᐅᔪᓂᑦ ᐊᐱᕆᔭᐅᓚᐅᖅᑐᑦ, “ᓄᓇᓕᒃ (ᕼᐋᒻᓚᐅᔫᑉ ᓄᓇᓕᐸᐅᔭᐅᑉᓘᓐᓃᑦ ᐊᑎᖓ) ᓂᐅᕕᐊᒃᓴᖃᕈᖕᓇᖁᕕᐅᒃ ᓄᓇᓕᐅᑉ ᓄᓇᖁᑎᖏᓐᓂᒃ?”

ᓂᕈᐊᕈᑕᐅᔪᓄᑦ ᖃᓄᐃᖓᓂᐅᔪᑦ ᐊᑐᓕᖅᑎᑦᑎᓂᖃᓚᐅᖅᑐᖅ, ᑖᒻᓇ ᒐᕙᒪᒃᑯᑦ ᒪᓕᒋᐊᖃᓚᐅᖅᑕᖓᑦ.  ᑭᓯᐊᓂ, ᓂᕈᐊᕈᑕᐅᔪᓄᑦ ᖃᓄᐃᖓᓂᐅᔪᖅ ᐊᑕᐅᓯᕐᒧᑦ ᕼᐋᒻᓚᐅᔪᒧᑦ ᐊᒃᑐᖅᓯᓂᖃᕐᓂᐊᙱᖦᖢᓂ ᐊᓯᐊᓄᑦ ᕼᐋᒻᓚᐅᔪᒥᑦ.  ᖃᓄᐃᖓᓂᐅᔪᖅ:  ᕼᐋᒻᓚᐅᔪᓗᒃᑖᑦ ᓂᕈᐊᓚᐅᖅᑐᑦ “ᐋᒃᑲ”-ᒥᒃ.

ᐃᖃᓗᐃᑦ ᐱᐊ ᐊᒻᒪᓗ ᐅᐊᐃᓂᓂᒃ ᓂᐅᕕᕐᕕᖕᒧᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖅ (2015)
ᐅᑭᐅᖅ 2015 ᐱᒋᐊᓵᖅᑎᓪᓗᒍ, ᒥᓂᔅᑕ ᑮᓇᐅᔭᓕᕆᔨᒃᑯᓐᓄᑦ ᓂᕈᐊᖅᑐᓕᕆᔨᒃᑯᑦ ᐊᖓᔪᖅᑳᖓᓐᓂᒃ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖃᖁᔨᓚᐅᖅᑐᖅ ᓄᓇᓕᐸᐅᔭᖅ ᐃᖃᓗᖕᓂᑦ ᐊᐱᕆᓗᒋᑦ ᓂᕈᐊᖅᑏᑦ “ᐃᑲᔪᖅᑐᐃᕕᑦ ᐱᐊ ᐊᒻᒪᓗ ᐅᐊᐃᓂᓂᒃ ᓂᐅᕕᕐᕕᖕᒥᑦ ᐅᒃᑯᐃᖁᔨᑉᓗᑎᑦ ᐃᖃᓗᖕᓂᑦ?”  ᓂᕈᐊᕈᑕᐅᔪᓄᑦ ᖃᓄᐃᖓᓂᐅᔪᑦ ᐊᑐᓕᖅᑎᑦᑎᓂᖃᕐᓂᐊᓚᐅᖏᑦᑐᖅ, ᒐᕙᒪᒃᑯᑦ ᓂᕈᐊᕈᖕᓇᖅᑐᑦ ᒪᓕᖕᓂᐊᕐᒪᖔᔾᔪᒃ ᒪᓕᖕᓂᐊᖏᒻᒪᖔᔾᔪᒡᓘᓐᓃᑦ ᓂᕈᐊᕈᑕᐅᔪᑦ.  ᓂᕈᐊᕈᑕᐅᔪᑦ 1126 “ᐄ”-ᒧᑦ ᓂᕈᐊᖅᑐᑦ, 326-ᖑᔪᑦ “ᐋᒃᑲ”-ᒧᑦ ᓂᕈᐊᖅᑐᑦ, ᐊᒻᒪᓗ 10-ᖑᔪᑦ ᓈᓴᖅᑕᐅᖃᑕᐅᓚᐅᖏᑦᑐᑦ ᓂᕈᐊᕈᑕᐅᔪᑦ.

ᐱᒻᒪᕆᐅᔪᑦ ᓯᕗᓪᓕᖅᐹᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓃᑦ

ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖃᓚᐅᖅᑐᑦ ᒪᓕᒃᖢᒋᑦ ᓯᕗᓪᓕᐅᓚᐅᖅᑐᖅ ᐊᐱᖅᑯᑎᓄᑦ ᓂᕈᐊᖅᑐᓕᕆᓂᕐᒧᑦ ᐱᖁᔭᖅ (ᓄᓇᑦᑎᐊᖅ), ᐊᑐᓕᖅᑎᑕᐅᓚᐅᖅᑐᖅ 1982-ᒥᑦ.  ᑕᒪᕐᒥᒃ ᐱᒻᒪᕆᐅᔪᖅ ᐃᓱᒪᓕᐅᕆᓂᕐᒧᑦ ᑕᐃᒪᙳᖅᑎᓪᓗᒍ ᓄᓇᕗᑦ.

ᐊᔾᔨᒌᓄᑦ ᑭᒡᒐᖅᑐᖅᑕᐅᓂᕐᒧᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖅ (1997)
ᓄᓇᕗᒻᒥ ᓂᕈᐊᖅᑏᑦ ᐊᐱᕆᔭᐅᓚᐅᖅᑐᑦ, “ᓯᕗᓪᓕᖅᐹᖅ ᓄᓇᕗᒻᒥ ᒪᓕᒐᓕᐅᕐᕕᒃ ᐊᔾᔨᒌᓂᒃ ᐊᖑᑎᓂᒃ ᐊᒻᒪᓗ ᐊᕐᓇᓂᒃ ᒪᓕᒐᓕᐅᖅᑎᓂᒃ ᓂᕈᐊᖅᑕᐅᔪᖃᖁᕕᐅᒃ ᑕᒪᕐᒥᒃ ᑭᒡᒐᖅᑐᐃᓂᐊᕐᓗᑎᒃ ᐊᑐᓂ ᑭᒡᒐᖅᑐᖅᑕᐅᕝᕕᐅᔪᒥᒃ? ᐄᓘᕝᕙ ᐋᒃᑲᓘᕝᕙ.”  ᑲᑎᓗᒃᑖᖅᖢᒋᑦ, 4668−ᖑᔪᑦ 12044-ᖑᔪᓂᑦ ᓂᕈᐊᖃᑕᐅᔪᖕᓇᖅᑐᑦ ᓂᕈᐊᓚᐅᖅᑐᑦ.  ᖃᓄᐃᖓᓂᐅᔪᑦ 1984-ᖑᔪᑦ “ᐄ”-ᒧᑦ ᓂᕈᐊᖅᑐᑦ ᐊᒻᒪᓗ 2666-ᖑᔪᑦ “ᐋᒃᑲ”-ᒧᑦ ᓂᕈᐊᖅᑐᑦ.

ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖅ ᓄᓇᕗᑦ ᓄᓇᓕᐸᐅᔭᖓᓄᑦ (1995)
ᓂᕈᐊᖅᑏᑦ ᓄᓇᕗᓗᒃᑖᕐᒥᑦ ᐊᐱᕆᔭᐅᓚᐅᖅᑐᑦ, “ᓇᓕᖓ ᓄᓇᓕᒃ ᓄᓇᕗᒻᒥᑦ ᓄᓇᓕᐸᐅᔭᐅᓇᔭᖅᐸ? ᐃᖃᓗᐃᑦ ᐅᕙᓘᕝᕙ ᑲᖏᖅᖠᓂᖅ?” ᓂᕈᐊᓚᐅᖅᑐᑦ 5869-ᖑᔪᑦ (59.7%) ᐃᖃᓗᖕᓄᑦ ᓂᕈᐊᖅᑐᑦ ᐊᒻᒪᓗ 3876-ᖑᔪᑦ ᑲᖏᖅᖠᓂᕐᒧᑦ.

ᓄᓇᓕᐅᑉ ᓄᓇᓕᖏᓐᓄᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖅ (1995)
ᓂᕈᐊᖅᑏᑦ ᕼᐋᒻᓚᐅᔪᓗᒃᑖᓂᑦ ᐊᐱᕆᔭᐅᓚᐅᖅᑐᑦ, “ᕼᐋᒻᓚᒃᑯᓐᓄᑦ ᑲᑎᒪᔩᑦ ᓂᐅᕕᐊᒃᓴᖃᕈᖕᓇᖁᕕᒋᑦ ᓄᓇᓕᐅᑉ ᓄᓇᖁᑎᖏᓐᓂᒃ?” ᐊᑐᓂ ᓄᓇᓖᑦ ᓂᕈᐊᓚᐅᖅᑐᑦ “ᐋᒃᑲ”-ᒥᒃ.

ᑭᒡᓕᓕᐅᕆᓂᕐᒧᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖅ (1992)
ᓂᕈᐊᖅᑏᑦ ᐊᐱᕆᔭᐅᓚᐅᖅᑐᑦ, “ᐃᑲᔪᖅᑐᐃᕕᑦ ᑭᒡᓕᓕᐅᖅᑕᐅᔪᕐᒥᑦ ᑕᑯᒃᓴᐅᔪᖅ ᖁᓛᓂᑦ ᓄᓇᙳᐊᕐᒥᑦ?” (ᑭᒡᓕᓕᐅᖅᓯᒪᑉᓗᓂ ᓇᐹᖅᑐᖃᕐᕕᐅᔫᑉ ᑭᒡᓕᖓᓂᑦ).  ᑕᒪᕐᒥᓗᒃᑖᖅ, 15471-ᖑᔪᑦ 27582-ᖑᔪᓂᑦ ᓂᕈᐊᕈᖕᓇᖅᑐᓂᑦ ᓂᕈᐊᓚᐅᖅᑐᑦ.  ᓂᕈᐊᕈᑕᐅᔪᑦ 8,347-ᖑᔪᑦ (56%) “ᐄ”-ᒧᑦ ᓂᕈᐊᓚᐅᖅᑐᑦ, ᓈᒻᒪᒃᓴᖅᖢᑎᒃ ᑭᒡᓕᓕᐅᖅᑕᐅᓯᒪᔪᕐᒥᑦ, ᐊᒻᒪᓗ 7000-ᖑᔪᑦ “ᐋᒃᑲ”-ᒧᑦ ᓂᕈᐊᓚᐅᖅᑐᑦ ᐊᖏᕈᑎᒋᙱᖦᖢᒍ ᑭᒡᓕᓕᐅᖅᑕᐅᓯᒪᔪᖅ.  124-ᖑᔪᑦ ᓂᕈᐊᕈᑕᐅᔪᑦ ᓈᓴᖅᑕᐅᖃᑕᐅᓚᐅᖏᑦᑐᑦ.

ᐊᕕᒃᑕᐅᓂᕐᒧᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖅ (1982)
ᓂᕈᐊᖅᑏᑦ ᐊᐱᕆᔭᐅᓚᐅᖅᑐᑦ: “ᐊᖏᕈᑎᒋᕕᐅᒃ ᐊᕕᒃᑕᐅᓂᖓ ᓄᓇᑦᑎᐊᖅ-ᐄᓘᕝᕙ ᐋᒃᑲᓘᕝᕙ?”  ᓂᕈᐊᕈᑕᐅᔪᑦ 5585 (56.5%) “ᐄ”-ᒧᑦ ᐊᒻᒪᓗ 4304 (43.5%) “ᐋᒃᑲ”-ᒧᑦ.