ᑲᖏᖅᖠᓂᐅᑉ ᓂᒋᐊᓄᑦ ᑕᒪᐅᓇᒥᐊᖅ ᓂᕈᐊᖅᑎᑦᑎᓂᖅ ᐱᒋᐊᓕᖅᑐᖅ

06/01/2014

ᑲᖏᖅᖠᓂᖅ, ᓄᓇᕗᑦ  –

ᓂᕈᐊᖅᑐᓕᕆᔨᒃᑯᑦ ᐊᖓᔪᖅᑳᖓᑦ ᑎᓕᓯᔾᔪᑎᒥᒃ ᓴᖅᑭᑦᑎᔪᖅ ᑕᒪᐅᓇᒥᐊᖅ ᓂᕈᐊᖅᑎᑦᑎᓂᐅᓂᐊᖅᑐᒧᑦ ᑲᖏᖠᓂᐅᑉ ᓂᒋᐊᓂᑦ. ᓂᕈᐊᒐᒃᓴᙳᕈᒪᔾᔪᑏᑦ ᐱᔭᐅᖃᑦᑕᕈᖕᓇᕐᓂᐊᖅᑐᑦ ᖃᐅᔨᓴᐅᑎ 2−ᒧᐊᖅᓯᕐᓗᒍ ᑕᓪᓕᒫᓂᑦ ᔭᓄᐊᕆ 10.

ᓄᓇᕗᒻᒥ ᑭᓇᑐᐃᓐᓇᖅ ᓂᕈᐊᖃᑕᐅᓂᖅ ᐊᔪᙱᑦᑐᖅ ᐊᔪᓕᖅᑎᑕᐅᓯᒪᙱᑯᓂ, ᓂᕈᐊᒐᒃᓴᙳᕈᖕᓇᖅᑐᖅ ᑕᒡᕙᓂ ᑕᒪᐅᓇᒥᐊᖅ ᓂᕈᐊᖅᑎᑦᑎᓂᐅᔪᒥᑦ; ᑲᖏᖅᖠᓂᐅᑉ ᓂᒋᐊᓂᕐᒥᐅᑕᐅᔭᕆᐊᖃᙱᑦᑐᑎᑦ ᓂᕈᐊᒐᒃᓴᐅᓂᐊᕐᓗᑎᑦ.

ᑕᒪᐅᓇᒥᐊᖅ ᓂᕈᐊᖅᑎᑦᑎᓂᖅᑕᖃᕆᐊᖃᓕᓚᐅᖅᑐᖅ ᐃᖅᑲᖅᑐᐃᔨᑎᒍᑦ ᓈᓴᐃᑲᓐᓂᕐᓂᖅᑕᖃᖅᑳᖅᑎᓪᓗᒍ ᓂᕈᐊᕈᑕᐅᓚᐅᖅᑐᓂᒃ ᐅᒃᑑᐱᕆ 28−ᒥᑦ ᓇᓗᓇᐃᖅᓯᓚᐅᕐᒪᑦ ᐊᔾᔨᒌᖕᓂᖏᓐᓄᑦ ᓂᕈᐅᕈᑕᐅᔪᑦ ᓂᕈᐊᒐᒃᓵᖕᓄᑦ ᖁᐊᓴ ᑯᓱᒐᖅ ᐊᒪᓗ ᐊᓕᒃᓵᓐᑐ ᓴᒻᒧᖅᑐᖅ.

ᓂᕈᐊᕐᓇᐅᑉ ᐅᑉᓗᖓ ᕕᕗᐊᕆ 10.