ᐊᐱᖅᑯᑕᐅᒐᔪᒃᑐᑦ

ᖃᑉᓯᐊᕐᔪᐃᑦ ᐊᑐᕈᖕᓇᖅᑕᑎᑦ. ᐅᑯᐊᓗᐊᖑᔪᑦ:

• ᓂᕈᐊᖅᑐᓕᕆᔨᐅᑉ ᑎᑎᕋᕐᕕᖓᓂᑦ - ᖁᓕᓄᑦ ᐅᑉᓗᓄᑦ 14 ᐅᑉᓗᐃᑦ ᓂᕈᐊᕐᓇᐅᑉ ᐅᑉᓗᐊᑕ ᓯᕗᓂᐊᒍᑦ ᐱᒋᐊᕐᓗᓂ 4 ᐅᑉᓗᐃᑦ ᓂᕈᐊᕐᓇᐅᑉ ᐅᑉᓗᐊᑕ ᓯᕗᓂᐊᒍᑦ ᐃᓱᓕᖦᖢᓂ, 12-ᒥᑦ 7-ᒧᑦ ᐅᓐᓄᒃᓴᒃᑯᑦ
  ᐅᕝᕙᓘᓐᓃᑦ
  ᓂᕈᐊᖅᐸᒌᕐᓇᒥᑦ – ᐊᑕᐅᓯᕐᒥᑐᐃᓐᓇᖅ ᐅᑉᓗᕐᒥᑦ, ᓄᓇᓕᖕᓂᑦ ᓂᕈᐊᖅᑐᓕᕆᔨᐅᑉ ᑎᑎᕋᕐᕕᖓᓂᑦ ᐱᖃᙱᑦᑐᓄᑦ, 7 ᐅᑉᓗᐃᑦ ᓂᕈᐊᕐᓇᐅᑉ ᐅᑉᓗᐊᑕ ᓯᕗᓂᐊᒍᑦ, 12-ᒥᑦ 7-ᒧᑦ ᐅᓐᓄᒃᓴᒃᑯᑦ.
• ᑎᑎᖅᑲᑎᒎᕆᐊᓕᒃ ᓂᕈᐊᕈᑎᒃᑯᑦ - ᓂᕈᐊᖅᑎᓄᑦ ᓄᓇᓕᖓᓐᓂᑦ ᐊᐅᓪᓚᖅᓯᒪᓂᐊᖅᑐᓄᑦ ᓂᕈᐊᕐᓇᐅᑉ ᐅᑉᓗᖏᓐᓂᑦ. ᑕᑕᑎᕐᓗᒍ ᐊᔾᔨᐅᖏᑦᑐᖅ ᓂᕈᐊᕈᑎᒧᑦ ᑐᒃᓯᕋᐅᑎ. ᐊᓕᓚᔪᒧᐊᕐᓗᒍ ᐅᕙᑉᑎᓐᓄᓪᓗ ᐊᐅᓚᖅᑎᓪᓗᒍ ᓱᑲᔪᒃᑯᑦ ᐅᕝᕙᓘᓐᓃᑦ ᑎᑎᖅᑲᑎᒍᑦ. ᑐᒃᓯᕋᐅᑎᑎᑦ ᓈᒻᒪᒋᔭᐅᒃᐸᑕ, ᓇᒃᓯᐅᑎᓂᐊᖅᑕᑉᑎᒋᑦ ᑎᑎᖅᑲᑎᒎᕆᐊᓕᖕᒥᑦ ᓂᕈᐊᕈᑎᒧᑦ ᐊᑐᖅᑐᒃᓴᓂᒃ.

ᖃᐅᔨᒪᓕᒃᑲᓐᓂᕈᒪᒍᕕᑦ, ᑕᑯᓗᒍ ᖃᓄᖅ ᓂᕈᐊᕈᖕᓇᕐᓂᖅ.

ᐊᔾᔨᒌᒃᑐᖃᖅᐸᑦ, ᐅᕝᕙᓘᓐᓃᑦ ᐊᔾᔨᒌᙱᓐᓂᐅᔪᑦ ᓂᕈᐊᖅᑕᐅᕐᓗᐊᓛᖑᔪᓄᑦ 2% ᑐᖔᓃᑉᐸᑦ ᑲᑎᖦᖢᒋᑦ ᓂᕈᐊᕈᑕᐅᔪᓂᑦ, ᓂᕈᐊᖅᑐᓕᕆᔨ ᑐᒃᓯᕋᐅᓯᐅᕐᓂᐊᖅᑐᖅ ᐃᖅᑲᖅᑐᐃᕝᕕᖕᒧᑦ ᓈᓴᐃᒃᑲᓐᓂᖁᔨᓗᓂ. ᓈᓴᐃᒃᑲᓐᓂᕐᓂᒥᑦ, ᐅᕐᓂᒃᑕᐅᓯᒪᔪᖕᓇᖅᑐᖅ ᓂᕈᐊᒐᒃᓴᓄᑦ, ᐃᖅᑲᖅᑐᐃᔨᐅᑉ ᓈᓴᕐᓂᐊᖅᑕᖏᑦ ᓂᕈᐊᕈᑏᑦ. ᖃᐅᔨᒍᑎᒃ ᓂᕈᐊᒐᒃᓴᖅ ᐊᒥᓲᓂᖅᓴᓂᒃ ᓂᕈᐊᖅᑕᐅᓂᖓᓄᑦ ᓂᕈᐊᒐᒃᓴᐅᖃᑎᖓᓂᐅᖓᓂᑦ, ᐊᒥᓲᓂᖅᓴᓂᒃ ᓂᕈᐊᖅᑕᐅᔪᖅ ᓂᕈᐊᖅᑕᐅᓂᐊᖅᑐᖅ. ᐱᖃᑖᒍᓪᓕ, ᐊᔾᔨᒌᖏᓐᓇᖅᐸᑕ ᓈᓴᖅᑕᐅᒃᑲᓐᓂᖅᑳᖅᑎᓪᓗᒋᑦ, ᓂᕈᐊᖅᑐᓕᕆᔨᐅᑉ ᐊᖓᔪᖅᑳᖓ ᑕᒪᐅᓇᒥᐊᖅ ᓂᕈᐊᖅᑎᑦᑎᓂᖃᖁᔨᓂᐊᖅᑐᖅ ᑕᐃᑲᓂ ᑭᒡᒐᖅᑐᖅᑕᐅᕝᕕᐅᔪᒥᑦ.

ᖃᐅᔨᒋᐊᕐᕕᒋᓗᒋᑦ ᓄᓇᕗᒻᒥ ᓂᕈᐊᖅᑐᓕᕆᔨᒃᑯᑦ ᓄᓇᓕᖕᓂᑦ ᐱᓕᕆᐊᒃᓴᖅᑕᖃᕐᒪᖔᑦ.

ᖃᐅᔨᒪᓕᕈᒃ ᒪᓕᒐᓕᐅᖅᑏᑦ ᒪᓕᒐᓕᐅᕐᕕᖕᒥᑦ ᓇᕿᓪᓗᒍ ᐃᓂᒋᔭᐃᑦ ᑭᒡᒐᖅᑐᖅᑕᐅᕝᕕᖕᓄᑦ ᓄᓇᙳᐊᖅ -ᒥᑦ. ᓇᕿᓪᓗᒍ ᐊᑎᖓ ᑕᑯᓂᐊᖅᑐᑎᑦ ᒪᓕᒐᓕᐅᖅᑎᐅᑉ ᒥᒃᓵᓄᑦ ᑐᑭᓯᐅᒪᔾᔪᑎᓂᒃ ᐊᒻᒪᓗ ᖃᓄᖅ ᖃᐅᔨᔭᐅᒋᐊᕐᕕᐅᔪᖕᓇᕐᒪᖔᑦ.

ᓂᕈᐊᕐᓂᖅ ᐊᔪᙱᑦᑐᑎᑦ ᐃᒪᓐᓇᐃᒃᑯᕕᑦ:

• ᑲᓇᑕᒥᐅᑕᖅ
• 18 ᐅᖓᑖᓄᓪᓘᓐᓃᑦ ᐅᑭᐅᓕᒃ
• ᓄᓇᕗᒻᒥᐅᑕᖅ

ᓂᕈᐊᖃᑕᐅᓂᖅ ᐊᔪᖅᑎᑕᐅᔪᑎᑦ ᐃᒪᓐᓇᐃᒃᑯᕕᑦ:

• ᐃᖅᑲᖅᑐᐃᕝᕕᖕᒧᐊᕆᐊᖃᖅᑎᑕᐅᒍᕕᑦ ᑐᑭᓯᐅᕌᓂᙱᓐᓂᕐᓄᑦ ᖃᓄᐃᓕᐅᕐᓂᕆᔭᖕᓄᑦ ᐅᕝᕙᓘᓐᓃᑦ ᐃᓱᒪᓕᐅᕐᓂᖅ ᐃᓕᖕᓂᑦ ᐊᔪᕈᕕᑦ;
• ᐱᕋᔭᓚᐅᕋᕕᑦ ᐊᒻᒪᓗ ᐃᓱᒪᓗᐊᕿᓂᖃᖅᑐᑦ ᐃᓂᖓᓐᓄᐊᖅᑕᐅᓯᒪᒐᕕᑦ;
• ᐸᓯᔭᐅᓯᒪᒐᕕᑦ ᓯᖁᒥᑦᑎᓂᕐᒧᑦ ᒪᓕᒐᕐᒥᑦ ᓇᓂᑐᐃᓐᓇᖅ ᑲᓇᑕᒥᑦ ᐅᑉᓗᒥᒥᑦ ᐱᒋᐊᖅᖢᒍ ᐅᑭᐅᑦ ᑕᓪᓕᒪᐃᑦ ᐃᓗᐊᓂᑦ.

ᑐᑭᓯᐅᒪᔾᔪᑎᒃᑲᓐᓂᕐᓂᒃ ᐱᔪᒪᒍᕕᑦ, ᑕᑯᓗᒍ ᑭᓇ ᓂᕈᐊᕈᖕᓇᖅᐸ?

ᓂᕈᐊᕈᖕᓇᖅᑐᑦ ᐊᑎᖏᓐᓃᒃᑯᕕᑦ, ᓂᕈᐊᖅᑎᐅᑉ ᑐᑭᓯᐅᒪᔾᔪᑎᖏᓐᓂᒃ ᐃᓗᓕᓕᖕᒥᑦ ᐊᓕᓚᔪᕐᒥᑦ ᐱᓂᐊᖅᑐᑎᑦ ᑎᑎᖅᑲᑎᒍᑦ ᓂᕈᐊᖅᑎᑦᑎᓂᕐᒧᑦ ᐅᑉᓗᕆᔭᐅᔪᑦ ᐱᒋᐊᓕᓵᖅᑎᓪᓗᒋᑦ ᑕᑯᒃᓴᐅᓗᑎᒃ ᓇᓂ ᐊᒻᒪᓗ ᖃᖓᒍ ᓂᕈᐊᕈᖕᓇᕐᒪᖔᖅᐲᑦ ᓂᕈᐊᕐᓇᐅᑉ ᐅᑉᓗᖓᓂᑦ, ᐊᒻᒪᓗ ᓇᓂ ᓂᕈᐊᕈᖕᓇᕐᒪᖔᖅᐲᑦ ᓂᕈᐊᖅᐸᒌᕐᓇᒥᑦ.

ᖃᐅᔨᒃᑲᓐᓂᕈᒪᒍᕕᑦ ᐊᓯᖏᓐᓂᒃ ᓂᕈᐊᒐᒃᓴᐅᔪᓂᑦ ᐅᕗᙵᕐᓗᑎᑦ ᑭᒡᒐᖅᑐᖅᑕᐅᕝᕕᖕᓄᑦ ᓄᓇᙳᐊᖅ.

ᓂᕈᐊᖅᑎᑦᑎᓂᕐᒥᑦ ᖃᓄᐃᖓᓃᑦ ᐃᓕᔭᐅᓯᒪᓂᐊᖅᑐᑦ ᐱᒋᐊᕐᕕᐊᓂᑦ ᑖᑉᓱᒪ ᖃᕆᑕᐅᔭᒃᑯᑦ ᑕᑯᔭᐅᒋᐊᖅᑕᕐᕕᐅᑉ ᐅᒃᑯᐊᕌᓂᑐᐊᖅᐸᑕ ᓂᕈᐊᕆᐊᖅᑐᕐᕖᑦ ᐊᒻᒪᓗ ᓈᓴᖅᑕᐅᕌᓂᒃᐸᑕ ᓂᕈᐊᕈᑏᑦ. ᑐᓴᖅᑎᔾᔪᑕᐅᓂᐊᕐᒥᔪᑦ ᓄᓇᓕᖕᒧᑦ ᑐᓴᒐᒃᓴᓂᑦ.

ᐊᑐᓂ ᑭᒡᒐᖅᑐᖅᑕᐅᕝᕖᑦ ᑭᒡᒐᖅᑐᖅᑕᐅᖃᑦᑕᖅᑐᑦ ᒪᓕᒐᓕᐅᖅᑎᐅᔪᒧᑦ ᒪᓕᒐᓕᐅᕐᕕᖕᒥᑦ. ᓄᓇᕗᒻᒥᑦ 22-ᓂᒃ ᑭᒡᒐᖅᑐᖅᑕᐅᕝᕕᒃᑕᖃᖅᑐᖅ. ᓄᓇᓕᐸᐅᔭᖅ ᐃᖃᓗᐃᑦ ᓯᑕᒪᓂᒃ ᑭᒡᒐᖅᑐᖅᑕᐅᕝᕕᖃᖅᑐᖅ, ᐃᓚᖏᓪᓗ ᐊᖏᓂᖅᓴᐃᑦ ᓄᓇᓖᑦ ᒪᕐᕉᖕᓂᒃ ᑭᒡᒐᖅᑐᖅᑕᐅᕝᕕᖃᖅᖢᑎᒃ.

ᓂᕈᐊᖃᑦᑕᖅᑐᒍᑦ ᒪᓕᒐᓕᐅᖅᑎᓂᒃ ᒪᓕᒐᓕᐅᕐᕕᖕᒧᑦ ᑭᑐᓗᒃᑖᓂᒃ ᓂᕈᐊᖅᑎᑦᑎᓂᖃᖅᑎᓪᓗᒍ.  ᒫᓐᓇᐅᔪᖅ 22-ᓂᒃ ᒪᓕᒐᓕᐅᖅᑎᑕᖃᖅᑐᖅ ᒪᓕᒐᓕᐅᕐᕕᖕᒥᑦ.  ᐊᑐᓂ ᑭᒑᖅᑐᐃᑉᓗᑎᒃ ᑭᒡᒐᖅᑐᖅᑕᐅᕝᕕᖓᓐᓂᑦ.  ᐱᓕᕆᐊᖓᑦ ᒪᓕᒐᓕᐅᖅᑎᐅᑉ ᒪᕐᕈᐃᓕᖓᔪᒃᑯᑦ ᐅᖃᐅᓯᐅᔪᖕᓇᖅᑐᖅ:

1. ᓂᑉᓕᐊᔾᔪᔾᔨᔨᐅᔪᖅ ᐃᓄᖕᓄᑦ ᑭᒡᒐᖅᑐᖅᑕᐅᕝᕕᖓᓂᑦ.
2. ᑭᒡᒐᖅᑐᐃᖅᑲᑦᑕᖅᑐᖅ ᐃᓅᔪᓂᒃ ᑭᒡᒐᖅᑐᖅᑕᐅᕝᕕᖓᓂᒃ, ᐃᓱᒪᒃᓴᖅᓯᐅᕈᑎᒋᑦᑎᐊᖅᖢᓂᐅᒃ ᐃᑲᔪᖅᑐᖅᖢᒋᓪᓗ ᐱᔪᒪᓂᕆᔭᖏᑦ.  ᒪᓕᒐᓕᐅᖅᑏᑦ ᐱᒻᒪᕆᐅᔪᒥᒃ ᐱᓕᕆᐊᖃᖅᑐᑦ ᑐᓴᐅᒪᑎᑦᑎᑦᑎᐊᕐᓂᕐᒥᒃ ᑭᒡᒐᖅᑐᖅᑕᖏᓐᓂᒃ  ᐱᓕᕆᐊᕆᔭᖏᑦᑕ ᒐᕙᒪᒃᑯᑦ ᒥᒃᓵᓄᑦ, ᐊᒻᒪᓗ, ᐱᖃᑖᒍᑦ, ᑐᓴᐅᒪᑎᒃᑭᑉᓗᒋᑦᑕᐅᖅ ᒐᕙᒪᒃᑯᑦ ᑭᒡᒐᖅᑐᖅᑕᖓᑦᑕ ᐱᔭᕆᐊᖃᖅᑕᖏᓐᓂᒃ ᐊᒻᒪᓗ ᐃᓱᒪᒋᔭᖏᓐᓂᒃ ᒫᓐᓇᐅᔪᖅ ᐱᔾᔪᑕᐅᔪᓂᒃ ᒐᕙᒪᒃᑯᑦ ᐱᔭᒃᓴᐅᑎᒋᔭᖏᓐᓂᒃ.

ᑐᑭᓯᐅᒪᔾᔪᑎᒃᑲᓐᓃᑦ ᒪᓕᒐᓕᐅᕐᕕᐅᑉ ᐊᒻᒪᓗ ᒪᓕᒐᓕᐅᖅᑏᑦ ᐱᓕᕆᐊᖓᑦᑕ ᒥᒃᓵᓄᑦ ᐱᔭᐅᔪᖕᓇᖅᑐᑦ ᖃᕆᑕᐅᔭᒃᑯᑦ ᑕᑯᔭᐅᒋᐊᖅᑕᕐᕕᖓᓐᓂᑦ ᓄᓇᕗᒻᒥ ᒪᓕᒐᓕᐅᕐᕕᒃ -ᒥᑦ.

ᓄᓇᕗᒻᒥ ᑕᒪᐅᓇᒥᐊᖅ ᓂᕈᐊᖅᑎᑦᑎᓂᖅᑕᖃᖃᑦᑕᖅᑐᖅ ᒪᓕᒐᓕᐅᖅᑎᒥᒃ ᒪᓕᒐᓕᐅᕐᕕᖕᒥᑦ ᓄᖅᑲᖅᑐᖃᖅᐸᑦ ᑭᑐᓗᒃᑖᓂᒃ ᓂᕈᐊᖅᑎᑦᑎᓂᖃᒃᑲᓐᓂᕐᓂᐊᓵᖅᑎᓪᓗᒍ. ᑕᒪᐅᓇᒥᐊᖅ ᓂᕈᐊᖅᑎᑦᑎᓂᕐᒥᑦ, ᑭᒡᒐᖅᑐᖅᑕᐅᕝᕕᖕᒥᑦ ᓂᕈᐊᖅᑏᑦ ᓂᕈᐊᕐᓂᖅ ᐊᔪᙱᑦᑐᑐᐃᓐᓇᐃᑦ ᓂᕋᐅᕈᖕᓇᖅᑐᑦ ᒪᓕᒐᓕᐅᖅᑎᒋᓂᐊᖅᑕᒥᖕᓂᑦ.

ᓄᓇᕗᒻᒥᑦ ᑭᑐᓗᒃᑖᓂᒃ ᓂᕈᐊᖅᑎᑦᑎᓂᖃᖃᑦᑕᖅᑐᖅ ᓂᕈᐊᕐᓂᖅᑕᖃᕌᖓᑦ ᓄᓇᓕᓗᒃᑖᓂᑦ ᓄᓇᕗᒻᒥ 22-ᓄᑦ ᒪᓕᒐᓕᐅᖅᑎᒃᓴᓄᑦ ᒪᓕᒐᓕᐅᕐᕕᖕᒧᑦ.

ᑭᖑᓪᓕᕐᒥᑦ ᓄᓇᕗᒻᒥᑦ ᑭᑐᓗᒃᑖᓂᒃ ᓂᕈᐊᖅᑎᑦᑎᓂᖅᑕᖃᕐᓂᐊᕐᒥᔪᖅ ᐅᑭᐊᒃᓵᖓᓂᑦ 2025. ᓂᕈᐊᖅᑎᑦᑎᓂᖅᑕᖃᖃᑦᑕᖅᑐᖅ ᐅᑭᐅᑦ ᓯᑕᒪᑦ ᐊᓂᒍᕐᓂᑕᒫᑦ. ᑭᖑᓪᓕᖅᐹᖅ ᑭᑐᓗᒃᑖᓂᒃ ᓂᕈᐊᖅᑎᑦᑎᓂᐅᓚᐅᖅᑐᖅ 2021-ᒥᑦ.

<p>ᓂᕈᐊᕐᓂᖅ ᐃᓱᓕᑉᐸᑦ, ᓂᕈᐊᖅᑐᓕᕆᓂᕐᒧᑦ ᐱᓕᕆᔩᑦ ᐅᒃᑯᐊᑦ ᐅᒃᑯᐊᕐᓂᐊᖅᑕᖏᑦ ᓈᓴᐃᕙᓪᓕᐊᓕᕐᓗᑎᒡᓗ ᓂᕈᐊᕈᑕᐅᓚᐅᖅᑐᓂᒃ ᐊᑐᓂ ᓂᕈᐊᒐᒃᓴᓄᑦ.</p>

<p>ᒪᓕᒃᑕᐅᔭᕆᐊᓕᖃᖅᑐᑦ ᓂᕈᐊᖅᑐᓕᕆᓂᕐᒧᑦ ᐱᓕᕆᔩᑦ ᒪᓕᒋᐊᖃᖅᑕᖏᓐᓂᒃ ᓈᓴᐃᑎᓪᓗᒋᑦ ᓈᓴᖅᑕᖏᓐᓂᒃ ᓇᓚᐃᑦᑎᖁᑉᓗᒋᑦ, ᓈᒻᒪᖁᑉᓗᒋᑦ ᐊᒻᒪᓗ ᑕᑯᒃᓴᐅᔪᒃᑰᖁᑉᓗᒋᑦ.&nbsp; ᓂᕈᐊᒐᒃᓴᐃᑦ ᐅᕝᕙᓘᓐᓃᑦ ᑭᒡᒐᖅᑐᖅᑎᐅᑎᑕᐅᔪᑦ ᑕᐅᑐᒍᖕᓇᖅᑎᑕᐅᔪᑦ ᓂᕈᐊᕈᑎᓂᒃ ᓈᓴᐃᑎᓪᓗᒋᑦ.</p>

ᓂᕈᐊᒐᒃᓴᙳᕐᓂᐊᕐᓗᓂ ᒪᓕᒐᓕᐅᖅᑎᐅᓂᕐᒧᑦ ᒪᓕᒐᓕᐅᕐᕕᖕᒥᑦ, ᒪᓕᒡᓗᒋᑦ ᐅᑯᐊ:

1. ᐅᖃᓕᒫᕐᓗᒋᑦ ᓄᓇᕗᒻᒥ ᓂᕈᐊᖅᑐᓕᕆᔨᒃᑯᑦ ᒪᓕᒃᑕᐅᔪᒃᓴᖏᑦ:

• ᒪᓕᒃᑕᐅᔪᒃᓴᖅ ᓂᕈᐊᒐᒃᓴᓄᑦ
• ᒪᓕᒃᑕᐅᔪᒃᓴᖅ ᑮᓇᐅᔭᓕᕆᔨᓄᑦ
• ᒪᓕᒃᑕᐅᔪᒃᓴᖅ ᐱᔫᒥᓵᕆᓂᕐᒧᑦ ᐊᐅᓚᑦᑎᔨᒧᑦ
• ᒪᓕᒃᑕᐅᔪᒃᓴᖅ ᓄᓇᕗᒻᒥ ᓂᕈᐊᖅᑐᓕᕆᓂᕐᒧᑦ ᐱᖁᔭᖏᓐᓄᑦ

2. ᖃᐅᔨᒋᐊᕐᕕᒋᓗᒋᑦ ᐱᓕᕆᕝᕕᒋᔭᑎᑦ.

ᐃᓚᖏᑦ ᐱᓕᕆᑎᑦᑎᔩᑦ ᒪᓕᒐᖃᖅᑐᑦ ᐱᓕᕆᔨᖏᓐᓄᑦ ᓂᕈᐊᒐᒃᓴᐅᔪᓄᑦ. ᐆᒃᑑᑎᒋᓗᒍ, ᓂᕈᐊᕐᓇᐅᑎᓪᓗᒍ ᐱᓕᕆᙱᓐᓂᐊᕐᓂᕐᒧᑦ ᑐᒃᓯᕋᐅᓯᐅᖅᓯᒪᔭᕆᐊᖃᕐᓂᐊᖅᑐᒃᓴᐅᔪᑎᑦ.

3. ᑮᓇᐅᔭᓕᕆᔨᑖᕐᓗᑎᑦ ᐊᒻᒪᓗ ᐱᔫᒥᓵᕆᓂᕐᒧᑦ ᐊᐅᓚᑦᑎᔨᒥᒃ.

ᓂᕈᐊᒐᒃᓴᐅᓗᑎᑦ, ᑮᓇᐅᔭᓕᕆᔨᖃᕆᐊᖃᖅᑐᑎᑦ. ᑮᓇᐅᔭᓕᕆᔨ ᐊᐅᓚᑦᑎᖃᑦᑕᖅᑐᖅ ᑮᓇᐅᔭᓗᒃᑖᓂᒃ ᐱᔫᒥᓵᕆᓂᖕᓄᑦ ᐱᔪᓂᒃ. ᐃᑲᔪᖅᑐᐃᔪᓂᒃ ᑐᓂᕐᕈᓯᐊᓂᒃ ᐱᖃᑦᑕᖅᑐᑦ, ᐊᑭᓕᖅᑐᖅᖢᒋᑦ ᐊᑐᕐᓂᑯᐃᑦ, ᐊᒻᒪᓗ ᐃᑲᔪᖅᖢᓂᑎᑦ ᑮᓇᐅᔭᐃᑦ ᒥᒃᓵᓄᑦ ᐅᓂᑉᑳᑦ ᐅᑎᖅᑎᑦᑕᕆᐊᓕᖕᓂᑦ ᓂᕈᐊᕐᓂᖅ ᐊᓂᒍᖅᑎᓪᓗᒍ. ᐃᓱᒪᖅᓱᖅᑐᑎᑦ ᐱᔫᒥᓵᕆᓂᕐᒧᑦ ᐊᐅᓚᑦᑎᔨᖃᕈᒪᒍᕕᑦ. ᐱᔫᒥᓵᕆᓂᕐᒧᑦ ᐊᐅᓚᑦᑎᔨᖃᕆᐊᖃᙱᑦᑐᑎᑦ.

4. ᓂᕈᐊᒐᒃᓴᙳᕐᓂᕋᕐᓗᑎᑦ.

ᑕᑕᑎᕐᓗᒍ ᓂᕈᐊᒐᒃᓴᙳᕈᒪᔾᔪᑎ. ᐊᑎᓕᐅᖅᑕᐅᔭᕆᐊᖃᖅᑐᖅ ᐃᓕᖕᓄᑦ ᐊᒻᒪᓗ ᑮᓇᐅᔭᓕᕆᔨᒋᔭᕐᓄᑦ.

• ᓂᕈᐊᖅᑐᓕᕆᔨᒋᔭᕐᓄᐊᕐᓗᒍ ᐅᕝᕙᓘᓐᓃᑦ ᓂᕈᐊᖅᑐᓕᕆᔨᐅᑉ ᐃᑲᔪᖅᑎᖓᓄᑦ.
• ᑕᐃᒪᓐᓇᐃᑦᑕᕆᐊᖃᖅᑐᑎᑦ 35 ᐅᑉᓗᐃᑦ ᓂᕈᐊᕐᓇᐅᑉ ᐅᑉᓗᐊᑕ ᓯᕗᓂᐊᒍᒥᑦ ᐱᒋᐊᕐᓗᓂ 31 ᐅᑉᓗᐃᑦ ᓂᕈᐊᕐᓇᐅᑉ ᐅᑉᓗᐊᑕ ᓯᕗᓂᐊᒍᒧᑦ ᑎᑭᓪᓗᒍ. ᐊᔪᕐᓇᖅᓯᖃᑦᑕᖅᑐᖅ ᑐᓂᓯᓂᕐᒧᑦ ᑭᖑᓪᓕᖅᐹᖅ ᐅᑉᓗᕐᒥᑦ 2-ᒧᐊᖅᐸᑦ ᖃᐅᔨᓴᐅᑦ (ᓄᓇᓕᐅᑉ ᖃᐅᔨᓴᐅᑎᖓ ᒪᓕᒡᓗᒍ).
• ᐊᑭᓖᓗᑎᑦ $200-ᒥᒃ ᑐᓂᐅᑎᒋᒍᖕᓂ ᓂᕈᐊᒐᒃᓴᙳᕈᒪᔾᔪᑏᑦ

ᖃᐅᔨᒃᑲᓐᓂᕈᒪᒍᕕᑦ ᓂᕈᐊᒐᒃᓴᙳᕐᓂᕐᒧᑦ ᑕᑯᓗᒍ ᓂᕈᐊᒐᒃᓴᓄᑦ.

ᓄᓇᓕᖕᒥᐅᑕᐃᑦ ᑕᐃᒪᓐᓇᐃᓕᐅᕈᖕᓇᕐᒥᔪᑦ ᓇᕿᓪᓗᒍ ᓄᓇᓕᖓᑦ ᑭᒡᒐᖅᑐᖅᑕᐅᕐᕖᑦ ᒪᒃᐱᖅᑐᕋᖓᓂᑦ: ᐅᕙᓂ