ᐊᐱᖅᑯᑕᐅᒐᔪᒃᑐᑦ

ᐄ. ᖃᐅᔨᒋᐊᕐᕕᒋᓗᒋᑦ ᓄᓇᕗᒻᒥ ᓂᕈᐊᖅᑐᓕᕆᔨᒃᑯᑦ ᖃᐅᔨᑎᑦᑐᖕᓇᖅᑕᑎᑦ.  ᐃᓚᐅᑎᓐᓂᐊᖅᐸᐃᑦ ᐊᑏᑦ, ᐃᓅᓕᕐᕖᑦ ᐊᒻᒪᓗ ᐊᖏᕐᕋᕕᑦ ᑐᕌᕈᑎᖓ.

T: 645-4610 (ᑲᖏᖅᖠᓂᖅ) ᐅᕝᕙᓘᓐᓃᑦ 1-800-267-4394 (ᐊᑭᖃᙱᑦᑐᖅ ᑲᓇᑕᒥᑦ)

E:  info@elections.nu.ca

ᐄ. ᐲᖅᑕᐅᔪᒪᒍᕕᑦ ᓂᕈᐊᕈᖕᓇᖅᑐᑦ ᐊᑎᖏᓐᓂᑦ ᑐᒃᓯᕋᐅᑎᒋᔭᕆᐊᖃᖅᑕᐃᑦ ᑎᑎᕋᕐᓗᑎᑦ ᐊᑎᓕᐅᖅᑕᐅᓯᒪᓂᕆᔭᐃᑦ ᓂᕈᐊᖅᑎᐅᓂᕐᒧᑦ ᓄᖅᑲᖅᑎᑕᐅᖁᓗᒍ.  ᐃᓚᐅᑎᓐᓂᐊᖅᐸᑎᑦ ᐊᑏᑦ, ᐃᓅᓕᕐᕖᑦ ᐊᒻᒪᓗ ᐊᖏᕐᕋᕕᑦ ᑐᕌᕈᑎᖓ.

T: 645-4610 (ᑲᖏᖅᖠᓂᖅ) ᐅᕝᕙᓘᓐᓃᑦ 1-800-267-4394 (ᐊᑭᖃᙱᑦᑐᖅ ᑲᓇᑕᒥᑦ)

E:  info@elections.nu.ca

ᓂᕈᐊᖅᑎᐅᑉ ᒥᒃᓵᓅᖓᔪᑦ ᑐᑭᓯᐅᒪᔾᔪᑎᓃᑦᑐᑦ ᓂᕈᐊᖅᑎᐅᑉ ᐊᑎᖓ, ᑎᑎᖅᑲᑎᒍᑦ ᑐᕌᕈᑎᖓ, ᐊᒻᒪᓗ ᐊᖏᕐᕋᖓᑕ ᑐᕌᕈᑎᖓ (ᐃᒡᓗᖓᑕ ᐊᒻᒪᓗ ᐊᑉᖁᑎᐅᑉ ᐊᑎᖓ) ᐊᑐᖅᑕᐅᖃᑦᑕᖅᑐᑦ ᓂᕈᐊᒐᒃᓴᓄᑦ ᐊᒻᒪᓗ ᐱᔫᒥᓵᕆᓂᕐᒧᑦ ᐱᓕᕆᔨᖏᓐᓄᑦ, ᓂᕈᐊᖅᑕᐅᓯᒪᔪᓄᑦ ᐅᖃᖃᑎᖃᕐᓂᐊᕐᓗᑎᒃ ᓂᕈᐊᖅᑎᓂᒃ, ᐃᓄᖕᓄᑦ ᑐᒃᓯᕋᐅᓯᐅᖅᑐᑦ ᐃᓄᓗᒃᑖᓄᑦ ᖃᐅᔨᓴᖅᑕᐅᖁᓗᒋᑦ ᓂᕈᐊᕈᖕᓇᖅᑐᑦ ᐊᑎᖏᑦ, ᐊᒻᒪᓗ ᖃᐅᔨᓴᐃᔨᓄᑦ (ᖃᐅᔨᒪᓐᓇᙱᖦᖢᒋᑦ ᑭᑑᖕᒪᖔᑕ) ᐃᑲᔪᖅᖢᒋᑦ ᓄᓇᕗᒻᒥ ᓂᕆᐊᖅᑐᓕᕆᔨᒃᑯᑦ ᑐᑭᓯᐊᒃᑲᓐᓂᕐᓂᖅᓴᐅᓂᐊᕐᒪᑕ ᓂᕈᐊᖃᑦᑕᕐᓂᐅᔪᑦ ᖃᓄᐃᓕᐅᕐᓂᕆᔭᖏᓐᓂᒃ.  ᑐᓂᐅᑎᒋᔭᐅᖃᑦᑕᕐᒥᔪᑦ ᑲᓇᑕᒥᑦ ᓂᕈᐊᖅᑐᓕᕆᔨᒃᑯᓐᓄᑦ ᐅᑉᓗᒥᒨᓕᖅᑐᕐᓂᐊᕐᓗᓂᒋᑦ ᑲᓇᑕᒥᑦ ᒐᕙᒪᒃᑯᑦ ᓂᕈᐊᕈᖕᓇᖅᑐᑦ ᐊᑎᖏᑦ.

ᓄᓇᕗᒻᒥ ᓂᕈᐊᖅᑐᓕᕆᔨᒃᑯᑦ ᐊᖏᕈᑎᒋᖃᑦᑕᖅᑕᖏᑦ ᐱᓕᕆᔨᖏᑦᑕ ᑐᑭᓯᐅᒪᔾᔪᑎᖏᑦ ᐊᒻᒪᓗ ᑳᓐᑐᕌᒃᖃᖅᑐᐃᑦ ᐱᔪᖕᓇᖅᑎᑦᑎᓂᖃᖅᑐᓄᑦ ᑎᒥᐅᔪᓄᑦ ᓲᕐᓗ ᓄᓇᕗᒻᒥ ᒪᓕᒐᓕᐅᕐᕕᖕᒧᑦ, ᑲᓇᑕᒥᑦ ᐱᔨᑦᑎᕋᐃᔨᒃᑯᓐᓄᑦ ᐊᒻᒪᓗ ᑲᓇᑕᒥᑦ ᑖᒃᓰᔭᐃᔭᖅᑐᓕᕆᔨᓄᑦ ᐱᔾᔪᑎᖃᖅᑐᓂᒃ ᐱᓕᕆᐊᒃᓴᓕᕆᓂᕐᓄᑦ.

ᐋᒃᑲ.  ᑐᓂᐅᑎᒋᖃᑦᑕᙱᑕᕗᑦ ᐃᓕᖕᓅᖓᔪᑦ ᑐᑭᓯᐅᒪᔾᔪᑏᑦ ᐱᔾᔪᑎᖃᖅᑐᓂᒃ ᐊᖅᑯᖅᑕᐃᕝᕕᒃ ᑐᓵᔨᒃᓴᖅᓯᐅᕐᓂᖓᓄᑦ.  ᓂᕈᐊᕈᖕᓇᖅᑐᑦ ᐊᑎᖏᑦ ᐊᑐᖅᑕᐅᖃᑦᑕᖅᑐᑦ ᓂᕈᐊᖅᑎᑦᑎᓂᕐᒧᑐᐃᓐᓇᖅ ᐊᒻᒪᓗ ᐊᐱᖅᓲᑏᑦ

ᓄᓇᕗᒻᒥ ᓂᕈᐊᖅᑐᓕᕆᔨᑯᑦ ᐱᖃᑦᑕᖅᑕᖏᑦ ᐃᓄᖕᒧᑦ ᑐᑭᓯᐅᒪᔾᔪᑏᑦ ᓇᖕᒥᓂᖅ ᓂᕈᐊᖅᑐᓂᑦ, ᓂᕈᐊᒐᒃᓴᓂᑦ, ᐱᓕᕆᐊᒃᓴᓄᑦ ᐆᒃᑐᖅᑐᓂᑦ, ᐱᓕᕆᔨᓂᑦ ᐊᒻᒪᓗ ᑳᓐᑐᖄᒃᖃᖅᑐᓂᑦ.

ᐅᑉᓗᒥᒨᓕᖅᑐᕐᓂᐊᖅᖢᒋᑦ ᓂᕈᐊᕈᖕᓇᖅᑐᑦ ᐊᑎᖏᑦ, ᐱᖃᑦᑕᕐᒥᔪᒍᑦ ᐃᓅᑉ ᑐᑭᓯᐅᒪᔾᔪᑎᖏᓐᓂᒃ ᑲᓇᑕᒥᑦ ᓂᕈᐊᖅᑐᓕᕆᔨᒃᑯᓐᓂᑦ, ᐃᓄᐃᑦ ᒥᒃᓵᓄᑦ ᓈᓴᐃᔨᒃᑯᓐᓂᑦ, ᓄᓇᒃᑰᕈᑎᓕᕆᔨᒃᑯᓐᓂᑦ, ᐊᓯᖏᓐᓂᒡᓗ ᐱᕝᕕᐅᖃᑦᑕᖅᑐᓂᒃ ᓄᓇᕗᒻᒥ ᓂᕈᐊᖅᑐᓕᕆᔨᒃᑯᑦ ᐊᖓᔪᖅᑳᖓᑦᑕ ᐊᑐᕐᕕᐅᔪᖕᓇᕋᓱᒋᔭᖏᓐᓂᑦ. 

ᔫᓂ 2017-ᒥᑦ, ᒪᓕᒐᓂᒃ ᑐᒃᓯᕋᐅᓯᐅᓚᐅᖅᑐᑦ (ᐱᖁᔭᒃᓴᖅ 49) ᓅᑕᐅᑉᓗᓂ, ᕼᐋᒻᓚᒃᑯᓐᓄᑦ ᑲᑎᒪᔨᓄᑦ, ᒪᐃᔭᒧᑦ ᐊᒻᒪᓗ ᐃᓕᓐᓂᐊᖅᑐᓕᕆᔨᐊᓛᓄᑦ ᑲᑎᒪᔨᓄᑦ ᓂᕈᐊᖅᑎᑦᑎᓂᐅᔪᑦ ᒪᓕᒐᖏᑦ ᓄᓇᕗᒻᒥ ᓂᕈᐊᖅᑐᓕᕆᓂᕐᒧᑦ ᐱᖁᔭᖏᓐᓂᒃ ᐊᑐᕐᓂᐊᓕᕐᓗᑎᒃ, ᓄᓇᕗᒻᒥ ᓂᕈᐊᖅᑐᓕᕆᔨᒃᑯᓪᓗ ᐱᔭᒃᓴᖃᓕᖅᑎᖦᖢᒋᑦ ᑲᒪᒋᓗᒋᑦ ᓄᓇᓕᖕᒥᑦ ᓂᕈᐊᖅᑎᑦᑎᓃᑦ ᐃᓚᒋᓗᒋᑦ ᓄᓇᕗᒻᒥ ᓂᕈᐊᖅᑎᑦᑎᓂᐅᖃᑦᑕᖅᑐᑦ ᐊᐅᓛᖅᑎᖃᑦᑕᖅᑕᑐᖃᖏᓪᓕ.  ᐱᔾᔪᑎᖓ ᓄᑖᖅ ᒪᓕᒐᐅᑉ ᐊᔾᔨᒌᓕᒃᑲᓐᓂᕆᐊᖁᑉᓗᒋᑦ ᕼᐋᒻᓚᒃᑯᓐᓄᑦ ᐊᒻᒪᓗ ᓄᓇᕗᒻᒥ ᒪᓕᒐᐅᔪᑦ, ᑕᐃᒪᓐᓇᐃᓕᐅᖅᖢᑎᒃ, ᓂᕈᐊᖅᑎᑦᑎᓂᐅᔪᓗᒃᑖᑦ ᐊᔪᕐᓇᙱᓐᓂᖅᓴᐅᓕᖅᑎᖦᖢᒋᑦ ᐊᒻᒪᓗ ᐱᐅᓂᖅᓴᐅᓕᖅᑎᖦᖢᒋᑦ.

ᓂᕈᐊᕆᐊᖅᑐᕐᕕᖕᒥᑦ ᓂᐊᖁᙴᒥᑦ, ᓂᕈᐊᕈᖕᓇᕐᓂᐊᖅᑐᑎᑦ ᐃᓕᓐᓂᐊᖅᑐᓕᕆᔨᐊᓛᓄᑦ, ᐊᒻᒪᓗ ᓂᕈᐊᕐᓗᑎᑦ ᕼᐋᒻᓚᒃᑯᑦ ᑲᑎᒪᔨᖏᓐᓄᑦ ᐊᒻᒪᓗ ᒪᐃᔭᒧᑦ ᐃᖃᓗᐃᑦ ᕼᐋᒻᓚᒃᑯᖏᓐᓄᑦ, ᐃᓚᒋᔭᐅᕝᕕᒋᔭᑎᑦ.  ᐊᒻᒪᓗ, ᐊᔪᙱᑎᑕᐅᒍᕕᑦ ᓂᕈᐊᖃᑕᐅᓂᕐᒧᑦ, ᓂᕈᐊᕈᖕᓇᖅᑐᑎᑦ ᐅᐃ-ᐅᐃ ᐃᓕᓐᓂᐊᖅᑐᓕᕆᔨᐊᓛᖏᓐᓄᑦ ᓂᕈᐊᖅᑎᑦᑎᓂᖏᓐᓂᑦ.

ᐋᒃᑲ. ᕼᐋᒻᓚᐃᑦ ᓄᓇᙳᐊᓕᐅᖅᑕᐅᓯᒪᔪᑦ ᐊᔾᔨᒋᙱᖦᖢᒋᑦ ᑭᒡᒐᖅᑐᖅᑕᐅᕝᕕᖕᓄᑦ.  ᐊᒃᑐᐊᖃᑎᒌᖕᓂᐊᕋᓗᐊᖅᑎᓪᓗᒋᑦ ᓂᕈᐊᕐᕕᐅᔪᑦ, ᐊᔾᔨᒌᙱᑦᑐᑦ.  25-ᓂᒃ ᓄᓇᓕᒃᑕᖃᖅᑐᖅ ᓄᓇᕗᒻᒥᑦ, ᐊᒻᒪᓗ 22-ᖏᓐᓇᕐᓂᒃ ᑭᒡᒐᖅᑐᖅᑕᐅᕝᕕᒃᑕᖃᖅᖢᓂ.  ᑐᑭᓯᐅᒪᔾᔪᑎᒃᑲᓐᓂᕐᓂᒃ ᐱᔪᒪᒍᕕᑦ, ᑕᑯᒋᐊᕐᓗᒍ ᓄᓇᙳᐊᖅ ᕼᐋᒻᓚᐅᔪᓄᑦ.

ᐃᓕᓐᓂᐊᖅᑐᓕᕆᔨᐊᓛᓄᑦ ᑲᑎᒪᔩᑦ ᑲᑎᒪᔨᐊᓛᖑᔪᑦ 7-ᓂᒃ ᑲᑎᒪᔨᖃᖅᖢᑎᒃ ᓄᓇᓕᖕᒥᑐᐃᓐᓇᖅ ᓂᕈᐊᖅᑕᐅᖃᑦᑕᖅᑐᑦ.  ᑲᑎᒪᖃᑦᑕᖅᑐᑦ ᐊᑕᐅᓰᖅᖢᑎᒃ ᑕᖅᑭᒥᑦ ᐱᓕᕆᖃᑎᒋᑉᓗᒋᑦ ᐊᕕᒃᑐᖅᓯᒪᔪᓂᑦ ᐃᓕᓐᓂᐊᕐᕕᖕᓂᑦ ᐊᐅᓛᖅᑎᑦᑎᔨᓂᒃ ᐊᒻᒪᓗ ᐃᓕᓐᓂᐊᕐᕕᖕᒥᑦ ᐱᓕᕆᔨᖏᓐᓂᒃ, ᐃᓱᒪᓕᐅᕆᖃᑦᑕᖅᑐᑦ ᖃᓄᖅ ᐃᓕᓐᓂᐊᖅᑎᑦᑎᓂᖅ ᐱᓕᕆᐊᖑᓂᐊᕐᒪᖔᑦ ᓄᓇᓕᖕᒥᑦ.  ᐱᔭᒃᓴᐅᑎᖏᓐᓂᑦ ᐃᓚᐅᔪᑦ ᐃᓕᓐᓂᐊᕈᑕᐅᓂᐊᖅᑐᓂᒃ ᑕᖅᑭᖅᓯᐅᑎᓕᐅᕐᓗᑎᒃ, ᐃᓕᓐᓂᐊᕆᐊᖃᑦᑕᖅᑐᓄᓪᓗ ᓇᓗᓇᐃᖅᓯᓂᕐᒧᑦ ᐊᑐᐊᒐᒥᒃ.  ᐅᐃ-ᐅᐃ-ᓄᑦ ᐃᓕᓐᓂᐊᖅᑐᓕᕆᔨᐊᓛᑦ ᐃᓕᓐᓂᐊᖅᑐᓕᕆᔨᐊᓛᓄᑦ ᑲᑎᒪᔨᐅᖕᒥᔪᑦ, ᑭᓯᐊᓂ ᑕᓪᓕᒪᓂᒃ ᑲᑎᒪᔨᖃᖅᖢᑎᒡᓕ 7-ᖑᙱᑦᑐᓂᑦ.  ᐅᖃᓕᒫᒃᑲᓐᓂᕆᑦ ᐱᔾᔪᑎᖃᖅᑐᓂᒃ ᐃᓕᓐᓂᐊᖅᑐᓕᕆᔨᐊᓛᓄᑦ ᑲᑎᒪᔨᓂᑦ.

ᒪᓕᒡᓗᒋᑦ ᓄᑖᑦ ᓂᕈᐊᖅᑎᑦᑎᓂᕐᒧᑦ ᒪᓕᒐᐃᑦ ᐊᑐᓕᕐᓂᐊᖅᑐᖅ ᐅᒃᑑᐱᕆ 1, 2018-ᒥᑦ, ᑕᒪᐅᓇᒥᐊᖅ ᓂᕈᐊᖅᑎᑦᑎᓂᖃᖃᑦᑕᔾᔮᕈᖕᓃᖅᑐᑦ ᕼᐋᒻᓚᒃᑯᑦ ᑲᑎᒪᔨᖏᓐᓄᑦ ᐅᕝᕙᓘᓐᓃᑦ ᐃᓕᓐᓂᐊᖅᑐᓕᕆᔨᐊᓛᒃᑯᑦ ᑲᑎᒪᔨᖏᓐᓄᑦ.  ᑭᓯᐊᓂ, ᐃᓐᓄᒃᑕᐅᔭᕆᐊᓖᑦ ᕼᐋᒻᓚᒃᑯᑦ ᑲᑎᒪᔨᖏᓐᓄᑦ ᐅᕝᕙᓘᓐᓃᑦ ᐃᓕᓐᓂᐊᖅᑐᓕᕆᔨᐊᓛᒃᑯᓐᓄᑦ ᓂᕈᐊᖅᑕᐅᖃᑦᑕᕐᓂᐊᖅᑐᑦ ᓂᕈᐊᒐᒃᓴᐅᓚᐅᖅᑐᓂᒃ ᓂᕈᐊᖅᑕᐅᖏᖦᖢᑎᒃ, ᐅᕝᕙᓘᓐᓃᑦ ᐊᔪᙱᑦᑐᓂᒃ ᐆᒃᑐᖅᑐᓂᒃ.  ᒪᐃᔭᒧᑦ ᐃᓂᐅᔪᖅ ᐃᓐᓄᒃᑕᐅᓯᒪᔪᖕᓃᖅᐸᑦ, ᐊᓯᐊᓂᒃ ᒪᐃᔭᒥᒃ ᓂᕈᐊᕐᓗᑎᒃ ᑕᒪᐅᓇᒥᐊᖅ ᓂᕈᐊᖅᑎᑦᑎᓂᒃᑯᑦ ᐅᕝᕙᓘᓐᓃᑦ ᑲᑎᒪᔩᑦ ᑎᒃᑯᐊᖅᓯᓗᑎᒃ.

ᓂᕈᐊᖅᑎᑦᑎᓂᖅ ᓂᕈᐊᕐᓂᐊᕐᓗᓂ ᐃᓄᖕᒥᒃ ᐃᓂᐅᔪᒧᐊᕐᓂᐊᕐᓗᓂ.  ᓄᓇᕗᒻᒥᑦ, ᓂᕈᐊᖃᑦᑕᖅᑐᒍᑦ ᒪᐃᔭᒥᒃ, ᕼᐋᒻᓚᒃᑯᑦ ᑲᑎᒪᔨᖏᓐᓂᒃ, ᐃᓕᓐᓂᐊᖅᑐᓕᕆᔨᐊᓛᒃᑯᑦ ᑲᑎᒪᔨᖏᓐᓂᒃ, ᐊᒻᒪᓗ ᒪᓕᒐᓕᐅᖅᑎᓂᒃ ᒪᓕᒐᓕᐅᕐᕕᖕᒧᑦ.

ᐊᐱᖅᑯᑏᑦ ᒥᒃᓵᓄᑦ ᓂᕈᐊᖅᑎᑦᑎᓂᖅ ᓂᕈᐊᕐᓂᐅᖕᒥᔪᖅ, ᑭᓯᐊᓂᓕ ᐃᓄᖕᒥᒃ ᓂᕈᐊᙱᓪᓗᑎᒃ, ᓂᕈᐊᖅᑏᑦ ᐊᐱᕆᔭᐅᖃᑦᑕᖅᑐᑦ ᐱᒻᒪᕆᐅᔪᒥᒃ ᐊᐱᖅᑯᑎᒥᒃ ᑭᐅᔭᕆᐊᖃᖅᖢᑎᒃ “ᐄ”-ᒥᒃ ᐅᕝᕙᓘᓐᓃᑦ “ᐋᒃᑲ”-ᒥᒃ.

ᐊᔾᔨᒌᒃᑐᖃᖅᐸᑦ, ᐅᕝᕙᓘᓐᓃᑦ ᐊᔾᔨᒌᙱᓐᓂᐅᔪᑦ ᓂᕈᐊᖅᑕᐅᕐᓗᐊᓛᖑᔪᓄᑦ 2% ᑐᖔᓃᑉᐸᑦ ᑲᑎᖦᖢᒋᑦ ᓂᕈᐊᕈᑕᐅᔪᓂᑦ, ᓂᕈᐊᖅᑐᓕᕆᔨ ᑐᒃᓯᕋᐅᓯᐅᕐᓂᐊᖅᑐᖅ ᐃᖅᑲᖅᑐᐃᕝᕕᖕᒧᑦ ᓈᓴᐃᒃᑲᓐᓂᖁᔨᓗᓂ. ᓈᓴᐃᒃᑲᓐᓂᕐᓂᒥᑦ, ᐅᕐᓂᒃᑕᐅᓯᒪᔪᖕᓇᖅᑐᖅ ᓂᕈᐊᒐᒃᓴᓄᑦ, ᐃᖅᑲᖅᑐᐃᔨᐅᑉ ᓈᓴᕐᓂᐊᖅᑕᖏᑦ ᓂᕈᐊᕈᑏᑦ. ᖃᐅᔨᒍᑎᒃ ᓂᕈᐊᒐᒃᓴᖅ ᐊᒥᓲᓂᖅᓴᓂᒃ ᓂᕈᐊᖅᑕᐅᓂᖓᓄᑦ ᓂᕈᐊᒐᒃᓴᐅᖃᑎᖓᓂᐅᖓᓂᑦ, ᐊᒥᓲᓂᖅᓴᓂᒃ ᓂᕈᐊᖅᑕᐅᔪᖅ ᓂᕈᐊᖅᑕᐅᓂᐊᖅᑐᖅ. ᐱᖃᑖᒍᓪᓕ, ᐊᔾᔨᒌᖏᓐᓇᖅᐸᑕ ᓈᓴᖅᑕᐅᒃᑲᓐᓂᖅᑳᖅᑎᓪᓗᒋᑦ, ᓂᕈᐊᖅᑐᓕᕆᔨᐅᑉ ᐊᖓᔪᖅᑳᖓ ᑕᒪᐅᓇᒥᐊᖅ ᓂᕈᐊᖅᑎᑦᑎᓂᖃᖁᔨᓂᐊᖅᑐᖅ ᑕᐃᑲᓂ ᑭᒡᒐᖅᑐᖅᑕᐅᕝᕕᐅᔪᒥᑦ.

ᖃᐅᔨᒪᓕᕈᒃ ᒪᓕᒐᓕᐅᖅᑏᑦ ᒪᓕᒐᓕᐅᕐᕕᖕᒥᑦ ᓇᕿᓪᓗᒍ ᐃᓂᒋᔭᐃᑦ ᑭᒡᒐᖅᑐᖅᑕᐅᕝᕕᖕᓄᑦ ᓄᓇᙳᐊᖅ -ᒥᑦ. ᓇᕿᓪᓗᒍ ᐊᑎᖓ ᑕᑯᓂᐊᖅᑐᑎᑦ ᒪᓕᒐᓕᐅᖅᑎᐅᑉ ᒥᒃᓵᓄᑦ ᑐᑭᓯᐅᒪᔾᔪᑎᓂᒃ ᐊᒻᒪᓗ ᖃᓄᖅ ᖃᐅᔨᔭᐅᒋᐊᕐᕕᐅᔪᖕᓇᕐᒪᖔᑦ.

ᓂᕈᐊᕈᖕᓇᖅᑐᑦ ᐊᑎᖏᓐᓃᒃᑯᕕᑦ, ᓂᕈᐊᖅᑎᐅᑉ ᑐᑭᓯᐅᒪᔾᔪᑎᖏᓐᓂᒃ ᐃᓗᓕᓕᖕᒥᑦ ᐊᓕᓚᔪᕐᒥᑦ ᐱᓂᐊᖅᑐᑎᑦ ᑎᑎᖅᑲᑎᒍᑦ ᓂᕈᐊᖅᑎᑦᑎᓂᕐᒧᑦ ᐅᑉᓗᕆᔭᐅᔪᑦ ᐱᒋᐊᓕᓵᖅᑎᓪᓗᒋᑦ ᑕᑯᒃᓴᐅᓗᑎᒃ ᓇᓂ ᐊᒻᒪᓗ ᖃᖓᒍ ᓂᕈᐊᕈᖕᓇᕐᒪᖔᖅᐲᑦ ᓂᕈᐊᕐᓇᐅᑉ ᐅᑉᓗᖓᓂᑦ, ᐊᒻᒪᓗ ᓇᓂ ᓂᕈᐊᕈᖕᓇᕐᒪᖔᖅᐲᑦ ᓂᕈᐊᖅᐸᒌᕐᓇᒥᑦ.

ᓂᕈᐊᖅᑎᑦᑎᓂᕐᒥᑦ ᖃᓄᐃᖓᓃᑦ ᐃᓕᔭᐅᓯᒪᓂᐊᖅᑐᑦ ᐱᒋᐊᕐᕕᐊᓂᑦ ᑖᑉᓱᒪ ᖃᕆᑕᐅᔭᒃᑯᑦ ᑕᑯᔭᐅᒋᐊᖅᑕᕐᕕᐅᑉ ᐅᒃᑯᐊᕌᓂᑐᐊᖅᐸᑕ ᓂᕈᐊᕆᐊᖅᑐᕐᕖᑦ ᐊᒻᒪᓗ ᓈᓴᖅᑕᐅᕌᓂᒃᐸᑕ ᓂᕈᐊᕈᑏᑦ. ᑐᓴᖅᑎᔾᔪᑕᐅᓂᐊᕐᒥᔪᑦ ᓄᓇᓕᖕᒧᑦ ᑐᓴᒐᒃᓴᓂᑦ.

ᓂᕈᐊᖃᑦᑕᖅᑐᒍᑦ ᒪᓕᒐᓕᐅᖅᑎᓂᒃ ᒪᓕᒐᓕᐅᕐᕕᖕᒧᑦ ᑭᑐᓗᒃᑖᓂᒃ ᓂᕈᐊᖅᑎᑦᑎᓂᖃᖅᑎᓪᓗᒍ.  ᒫᓐᓇᐅᔪᖅ 22-ᓂᒃ ᒪᓕᒐᓕᐅᖅᑎᑕᖃᖅᑐᖅ ᒪᓕᒐᓕᐅᕐᕕᖕᒥᑦ.  ᐊᑐᓂ ᑭᒑᖅᑐᐃᑉᓗᑎᒃ ᑭᒡᒐᖅᑐᖅᑕᐅᕝᕕᖓᓐᓂᑦ.  ᐱᓕᕆᐊᖓᑦ ᒪᓕᒐᓕᐅᖅᑎᐅᑉ ᒪᕐᕈᐃᓕᖓᔪᒃᑯᑦ ᐅᖃᐅᓯᐅᔪᖕᓇᖅᑐᖅ:

1. ᓂᑉᓕᐊᔾᔪᔾᔨᔨᐅᔪᖅ ᐃᓄᖕᓄᑦ ᑭᒡᒐᖅᑐᖅᑕᐅᕝᕕᖓᓂᑦ.
2. ᑭᒡᒐᖅᑐᐃᖅᑲᑦᑕᖅᑐᖅ ᐃᓅᔪᓂᒃ ᑭᒡᒐᖅᑐᖅᑕᐅᕝᕕᖓᓂᒃ, ᐃᓱᒪᒃᓴᖅᓯᐅᕈᑎᒋᑦᑎᐊᖅᖢᓂᐅᒃ ᐃᑲᔪᖅᑐᖅᖢᒋᓪᓗ ᐱᔪᒪᓂᕆᔭᖏᑦ.  ᒪᓕᒐᓕᐅᖅᑏᑦ ᐱᒻᒪᕆᐅᔪᒥᒃ ᐱᓕᕆᐊᖃᖅᑐᑦ ᑐᓴᐅᒪᑎᑦᑎᑦᑎᐊᕐᓂᕐᒥᒃ ᑭᒡᒐᖅᑐᖅᑕᖏᓐᓂᒃ  ᐱᓕᕆᐊᕆᔭᖏᑦᑕ ᒐᕙᒪᒃᑯᑦ ᒥᒃᓵᓄᑦ, ᐊᒻᒪᓗ, ᐱᖃᑖᒍᑦ, ᑐᓴᐅᒪᑎᒃᑭᑉᓗᒋᑦᑕᐅᖅ ᒐᕙᒪᒃᑯᑦ ᑭᒡᒐᖅᑐᖅᑕᖓᑦᑕ ᐱᔭᕆᐊᖃᖅᑕᖏᓐᓂᒃ ᐊᒻᒪᓗ ᐃᓱᒪᒋᔭᖏᓐᓂᒃ ᒫᓐᓇᐅᔪᖅ ᐱᔾᔪᑕᐅᔪᓂᒃ ᒐᕙᒪᒃᑯᑦ ᐱᔭᒃᓴᐅᑎᒋᔭᖏᓐᓂᒃ.

ᑐᑭᓯᐅᒪᔾᔪᑎᒃᑲᓐᓃᑦ ᒪᓕᒐᓕᐅᕐᕕᐅᑉ ᐊᒻᒪᓗ ᒪᓕᒐᓕᐅᖅᑏᑦ ᐱᓕᕆᐊᖓᑦᑕ ᒥᒃᓵᓄᑦ ᐱᔭᐅᔪᖕᓇᖅᑐᑦ ᖃᕆᑕᐅᔭᒃᑯᑦ ᑕᑯᔭᐅᒋᐊᖅᑕᕐᕕᖓᓐᓂᑦ ᓄᓇᕗᒻᒥ ᒪᓕᒐᓕᐅᕐᕕᒃ -ᒥᑦ.

ᓄᓇᕗᒻᒥᑦ ᑭᑐᓗᒃᑖᓂᒃ ᓂᕈᐊᖅᑎᑦᑎᓂᖃᖃᑦᑕᖅᑐᖅ ᓂᕈᐊᕐᓂᖅᑕᖃᕌᖓᑦ ᓄᓇᓕᓗᒃᑖᓂᑦ ᓄᓇᕗᒻᒥ 22-ᓄᑦ ᒪᓕᒐᓕᐅᖅᑎᒃᓴᓄᑦ ᒪᓕᒐᓕᐅᕐᕕᖕᒧᑦ.

ᓂᕈᐊᕐᓂᖅ ᐃᓱᓕᑉᐸᑦ, ᓂᕈᐊᖅᑐᓕᕆᓂᕐᒧᑦ ᐱᓕᕆᔩᑦ ᐅᒃᑯᐊᑦ ᐅᒃᑯᐊᕐᓂᐊᖅᑕᖏᑦ ᓈᓴᐃᕙᓪᓕᐊᓕᕐᓗᑎᒡᓗ ᓂᕈᐊᕈᑕᐅᓚᐅᖅᑐᓂᒃ ᐊᑐᓂ ᓂᕈᐊᒐᒃᓴᓄᑦ.

ᒪᓕᒃᑕᐅᔭᕆᐊᓕᖃᖅᑐᑦ ᓂᕈᐊᖅᑐᓕᕆᓂᕐᒧᑦ ᐱᓕᕆᔩᑦ ᒪᓕᒋᐊᖃᖅᑕᖏᓐᓂᒃ ᓈᓴᐃᑎᓪᓗᒋᑦ ᓈᓴᖅᑕᖏᓐᓂᒃ ᓇᓚᐃᑦᑎᖁᑉᓗᒋᑦ, ᓈᒻᒪᖁᑉᓗᒋᑦ ᐊᒻᒪᓗ ᑕᑯᒃᓴᐅᔪᒃᑰᖁᑉᓗᒋᑦ.  ᓂᕈᐊᒐᒃᓴᐃᑦ ᐅᕝᕙᓘᓐᓃᑦ ᑭᒡᒐᖅᑐᖅᑎᐅᑎᑕᐅᔪᑦ ᑕᐅᑐᒍᖕᓇᖅᑎᑕᐅᔪᑦ ᓂᕈᐊᕈᑎᓂᒃ ᓈᓴᐃᑎᓪᓗᒋᑦ.

ᐃᓚᖏᑦ ᐱᓕᕆᓂᐊᖅᑐᒃᓴᐅᔪᑦ ᐃᑲᕐᕋᓗᒃᑖᓂᑦ ᓂᕈᐊᕆᐊᖅᑐᕐᕖᑦ ᐅᒃᑯᐃᖓᓂᕆᔭᖓᓂᑦ.  ᐱᔭᕆᐊᖃᖅᐸᑦ, ᐱᓕᕆᑎᑦᑎᔩᑦ ᒪᕐᕈᖕᓄᑦ ᐃᑲᕐᕋᓄᑦ ᑎᑭᓪᓗᒍ ᐱᓕᕆᔨᖏᓐᓂᒃ ᓂᕈᐊᖅᑎᐅᔪᓂᒃ ᐱᓕᕆᙱᑎᑦᑎᔭᕆᐊᖃᖅᑐᑦ ᓂᕈᐊᕐᓂᐊᕐᓗᑎᒃ.  ᐱᓕᕆᑎᑦᑎᔪᖅ ᓂᕈᐊᕐᓗᓂ ᐃᑲᕐᕋᓂᑦ ᓇᒧᖓᓕᑉᐸᓪᓗ ᐱᓕᕆᙱᓐᓂᐊᕐᓂᖏᓐᓄᑦ.  ᓂᕈᐊᖅᑏᑦ ᐱᓕᕆᖃᑦᑕᖅᑐᑦ 9-ᒥᑦ ᐅᑉᓛᒃᑯᑦ 5-ᒧᑦ ᐅᓐᓄᒃᓴᒃᑯᑦ ᐱᓕᕇᓐᓇᕐᓂᐊᕐᓗᑎᒃ.

ᐊᓯᐊᖑᖅᓯᓂᐊᕐᓗᓂ ᐅᕝᕙᓘᓐᓃᑦ ᐋᖅᑭᒋᐊᖅᓯᓂᐊᕐᓗᓂ ᐃᓕᖕᓅᖓᔪᓂᒃ ᑐᑭᓯᐅᒪᔾᔪᑎᓂᒃ ᓂᕈᐊᕈᖕᓇᖅᑐᑦ ᐊᑎᖏᓐᓃᑦᑐᓂᒃ, ᑕᑕᑎᕐᓗᒍ ᐊᓯᐊᙳᖅᓯᓂᖅ ᐊᒻᒪᓗ ᐋᖅᑭᒃᓯᒋᐊᖅᓯᓂᕐᒧᑦ ᑕᑕᑎᕈᑎ ᖃᕆᑕᐅᔭᒥᒃ ᐊᑐᕐᓗᑎᑦ. ᐊᓕᓚᔪᒧᐊᓕᕐᓗᒍ ᐅᕙᑉᑎᓐᓄᓪᓗ ᐊᐅᓪᓚᖅᑎᓪᓗᒍ ᓱᑲᔪᒃᑯᑦ ᑎᑎᖅᑲᑎᒍᓪᓘᓐᓃᑦ.