ᓄᕙᒡᔪᐊᕐᓇᖅ-19 ᐊᒃᑐᖅᓯᓂᖃᕐᓂᐊᖅᑐᖅ ᐊᐅᓚᑦᑎᓂᕆᔭᑉᑎᖕᓂᑦ ᐅᑭᐅᓖᑦ (ᐅᒃᑑᐱᕆ) 25, 2021-ᒥᑦ ᑭᑐᓗᒃᑖᓂᒃ ᓂᕈᐊᖅᑎᑦᑎᓂᕐᒥᑦ.

ᐱᓕᕆᖃᑎᒋᔭᕗᑦ ᐊᖓᔪᖅᑳᖅ ᐃᓄᓗᒃᑖᓂᒃ ᐋᓐᓂᐊᖃᖅᑕᐃᓕᒪᔪᓕᕆᔨ ᓄᓇᓕᕗᑦ ᐃᓚᐅᖃᑕᐅᔪᖕᓇᕐᓂᐊᕐᓗᑎᒃ ᒐᕙᒪᖃᕐᓂᕗᑦ ᐅᓗᕆᐊᓇᖅᑐᖃᙱᑦᑐᒦᒻᒫᕐᓗᑕ. ᐅᖃᓕᒫᒃᑲᓐᓂᕆᑦ.

ᑕᑯᒃᑭᑦ ᓄᑖᖑᓛᑦ ᓄᕙᒡᔪᐊᕐᓇᖅ-19−ᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᓪᓗ ᐊᑐᖅᑕᐅᔪᓐᓇᖅᑐᑦ.

ᑭᓇ ᓂᕈᐊᕈᖕᓇᖅᐸ?

ᑭᓇ ᓂᕈᐊᕈᖕᓇᖅᐸ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᕐᒥᑦ?

ᐃᓚᖏᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓃᑦ ᓄᓇᕗᓗᒃᑖᒨᖓᔪᑦ ᐊᒻᒪᓗ ᐅᒃᑯᐃᖓᑉᓗᑎᒃ ᓂᕈᐊᖅᑎᓗᒃᑖᓄᑦ.  ᐃᓚᖏᑦ ᑭᒡᓕᖃᖅᑐᑦ ᐃᓚᐃᓐᓇᖏᓐᓄᑦ ᓄᓇᓕᐅᔪᓄᑦ ᐅᕝᕙᓘᓐᓃᑦ ᐃᓄᖕᓄᑦ ᑐᕌᖅᑕᐅᔪᓄᑦ.  ᐊᐱᖅᑯᑎᓄᑦ ᓂᕈᐊᖅᑎᑦᑎᓂᖃᕐᕕᐅᔪᖅ ᐊᒻᒪᓗ ᓂᕈᐊᖅᑎᐅᓂᐊᖅᑐᑦ ᑎᑎᕋᖅᑕᐅᓯᒪᖃᑦᑕᖅᑐᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᕐᒥᒃ ᑐᓴᖅᑎᑦᑎᓂᖃᕌᖓᑕ.

ᓂᕈᐊᕐᓂᐊᕐᓗᑎᑦ, ᓂᕈᐊᖅᑎᑦᑎᓂᖃᕐᕕᐅᔪᒦᑦᑕᕆᐊᖃᖅᑐᑎᑦ ᐊᒻᒪᓗ ᑐᕌᖓᔪᓂᒃ ᓂᕈᐊᖅᑎᐅᖃᑕᐅᓗᑎᑦ.  ᐃᒪᓐᓇᐃᑦᑕᕆᐊᖃᕐᒥᔪᑎᑦ: 

  • ᑲᓇᑕᒥᐅᑕᖅ;
  • 18-ᓂᒃ ᐅᖓᑖᓂᓘᓐᓃᑦ ᐅᑭᐅᓕᒃ;
  • ᓄᓇᕗᒻᒥᐅᑕᖅ; ᐊᒻᒪᓗ,
  • ᓂᕈᐊᖃᑕᐅᓂᕐᒧᑦ ᐊᔪᓕᖅᑎᑕᐅᓯᒪᙱᓪᓗᑎᑦ (ᑕᑯᓗᒍ “ᐊᔪᓕᖅᑎᑕᐅᓯᒪᔪᑦ” ᐊᑖᓂ).

ᑭᓇ ᓄᓇᕗᒻᒥᐅᑕᐅᕙ?

ᓄᓇᕗᒻᒥᐅᑕᐅᔪᑎᑦ ᐃᒪᓐᓇᐃᒃᑯᕕᑦ:

  • ᓄᓇᕗᒻᒥᐅᑕᐅᓯᒪᓕᕋᕕᑦ ᐊᑕᐅᓯᕐᒥᑦ ᐅᑭᐅᒥᑦ ᐅᖓᑖᓄᓪᓘᓐᓃᑦ ᐊᐱᖅᑯᑎᓄᑦ ᓂᕈᐊᖅᑎᑦᑎᓂᐅᑉ ᐅᑉᓗᐊᓂᑦ; ᐅᕝᕙᓘᓐᓃᑦ,
  • ᓄᓇᓕᖕᓂᑦ ᐊᐅᓪᓚᖅᓯᒪᓚᐅᐱᓪᓚᒃᑯᕕᑦ, ᑭᓯᐊᓂ ᓄᓇᕗᑦ ᐊᖏᕐᕋᕆᑉᓗᒍ ᓱᓕ (ᐆᒃᑑᑎᒋᓗᒍ, ᐃᓕᓐᓂᐊᖅᑏᑦ, ᐋᓐᓂᐊᕐᕕᓕᐊᖅᓯᒪᔪᑦ, ᐊᒻᒪᓗ ᐃᓄᐃᑦ ᑎᒍᔭᐅᓯᒪᔪᑦ).

ᓄᓇᕗᒻᒥᐅᑕᐅᖏᑦᑐᑎᑦ ᓄᓇᕗᒻᒥᑦ ᐊᐅᓪᓚᕈᕕᑦ ᐱᔾᔪᑎᖃᖅᖢᑎᑦ ᐱᓕᕆᐊᖅᑖᕐᓂᖕᓄᑦ ᐱᓕᕆᐊᕇᓐᓇᕐᓂᐊᖅᑕᖕᓂᑦ.

ᐊᔪᓕᖅᑎᑕᐅᓃᑦ

ᓂᕈᐊᕐᓂᖅ ᐊᔪᖅᑐᑎᑦ ᐃᒪᓐᓇᐃᒃᑯᕕᑦ:

  • ᐃᖅᑲᖅᑐᐃᕝᕕᒃᑯᑦ ᐅᖃᖅᓯᒪᖕᒪᑕ ᑐᑭᓯᐊᕌᓂᙱᓐᓇᒃᑎᒃ ᖃᓄᐃᓕᐅᕐᓂᕆᔭᑎᑦ ᐅᕝᕙᓘᓐᓃᑦ ᐃᓕᖕᓂᒃ ᐃᓱᒪᓕᐅᕐᓂᖅ ᐊᔪᖃᑦᑕᕋᕕᑦ;
  • ᐱᕋᔭᓚᐅᕋᕕᑦ ᐃᓱᒪᒃᑯᑦ ᐋᓐᓂᐊᖃᖅᑐᓄᓪᓗ ᐃᓂᒋᔭᐅᔪᒦᖦᖢᑎᑦ; ᐅᕝᕙᓘᓐᓃᑦ,
  • ᐸᓯᔭᐅᓚᐅᕋᕕᑦ ᓯᖁᒻᒥᑦᑎᓂᕐᒧᑦ ᓂᕈᐊᖅᑐᓕᕆᓂᕐᒧᑦ ᒪᓕᒐᕐᒥᑦ ᓇᓂᑐᐃᓐᓇᖅ ᑲᓇᑕᒥᑦ ᐅᑭᐅᑦ ᑕᓪᓕᒪᑦ ᐃᓗᐊᓂᑦ ᐅᑉᓗᒥᒧᑦ ᑎᑭᖦᖢᒍ.

ᓂᕈᐊᕈᖕᓇᖅᑐᑦ ᐊᑎᖏᑦ

ᓂᕈᐊᕐᓂᐊᕐᓗᑎᑦ ᓂᕈᐊᕈᖕᓇᖅᑐᑦ ᐊᑎᖏᓐᓃᑦᑕᕆᐊᖃᖅᑐᑎᑦ.

ᑭᑐᓗᒃᑖᑦ ᐊᑎᖃᖅᑐᑦ ᐱᔪᖕᓇᐅᑎᖃᖅᖢᑎᒃ ᓂᕈᐊᕐᓂᕐᒧᑦ ᓄᓇᕗᒻᒥᑦ. ᐃᓗᐊᓃᑦᑐᑦ ᐊᑐᓂ ᓂᕈᐊᖅᑎᐅᑉ ᐊᑎᖏᑦ, ᑎᑎᖅᑲᑎᒍᑦ ᑐᕌᕈᑎᖏᑦ, ᐊᒻᒪᓗ ᓄᓇᓕᖕᒥᑦ ᑐᕌᕈᑎᖓᑦ (ᐃᒡᓗᖓᑦᑕ ᐊᒻᒪᓗ ᓄᓇᐅᑉ ᓈᓴᐅᑎᖓ).

ᓂᕈᐊᕐᓂᐊᕐᓗᑎᑦ, ᓂᕈᐊᕈᖕᓇᖅᑐᑦ ᐊᑎᖏᓐᓃᑦᑕᕆᐊᖃᖅᑐᑎᑦ. ᑖᒻᓇ ᓄᓇᕗᒻᒥ ᓂᕈᐊᖅᑐᓕᕆᔨᒃᑯᑦ ᑎᑎᖅᑲᐅᑎᖓᑦ ᑭᑐᓗᒃᑖᖑᔪᑦ ᓄᓇᕗᒻᒥ ᓂᕈᐊᕈᖕᓇᖅᖢᑎᒃ ᓂᕈᐊᕈᖕᓇᖅᑐᑦ ᐊᑎᖏᓐᓄᐊᖃᑕᐅᔪᖕᓇᖅᑐᑎᑦ ᖃᖓᒃᑯᑐᐃᓐᓇᖅ, ᐃᓚᐅᑉᓗᑎᒃ ᐅᑉᓗᕐᒥᑦ ᓂᕈᐊᕈᕕᑦ ᓈᒻᒪᒋᔭᐅᔪᒥᒃ ᓇᓗᓇᐃᑯᑕᖃᕈᕕᑦ ᑭᓇᐅᓂᕐᓄᑦ. 

ᖃᓄᖅ ᐊᑐᖃᑦᑕᖅᐱᑎᒍ ᓂᕈᐊᕈᖕᓇᖅᑐᑦ ᐊᑎᖏᑦ?

ᓄᓇᕗᒻᒥ ᓂᕈᐊᖅᑐᓕᕆᔨᒃᑯᑦ ᐊᑐᖃᑦᑕᖅᑕᖓᑦ ᓂᕈᐊᕈᖕᓇᖅᑐᑦ ᐊᑎᖏᑦ ᑭᓇᑐᐃᓐᓇᖅ ᒪᕐᕈᐃᕐᓗᓂ ᓂᕈᐊᖁᓇᒍ ᐊᑐᖅᑕᐅᖃᑦᑕᕐᒥᔪᖅ ᓂᕈᐊᖅᑎᑦᑎᓂᖃᕐᓂᐊᓵᖅᑎᓪᓗᒍ ᑎᑎᖅᑲᑎᒍᑦ ᐊᐅᓪᓚᖅᑎᖦᖢᒋᑦ ᓂᕈᐊᖅᑎᒧᑦ ᓂᕈᐊᖅᑎᒨᖓᔪᑦ ᑐᑭᓯᐅᒪᔾᔪᑏᑦ ᖃᐅᔨᑎᑦᑎᔪᑦ ᐃᓕᖕᓂᑦ ᓇᓂ ᓄᓇᓕᖕᓂᑦ ᓂᕈᐊᕐᓂᐊᕐᒪᖔᖅᐲᑦ.

ᓂᕈᐊᕈᖕᓇᖅᑐᑦ ᐊᑎᖏᑦ ᐊᑐᖅᑕᐅᑐᐃᓐᓇᖃᑦᑕᖅᑐᑦ ᓂᕈᐊᖅᑎᑦᑎᓂᕐᒨᖓᔪᓂᒃ ᐊᑐᖅᑕᐅᖃᑦᑕᙱᑦᑐᖅ ᐃᖅᑲᖅᑐᐃᕝᕕᖕᒥᑦ ᑐᓵᔨᓂᒃ ᕿᓂᕈᑕᐅᑉᓗᑎᒃ ᐊᓯᖏᓐᓄᓪᓘᓐᓃᑦ ᐱᔾᔪᑕᐅᔪᓄᑦ.

ᓂᕈᐊᕈᖕᓇᖅᑐᑦ ᐊᑎᖏᓐᓃᑉᐳᖓ?

ᖃᐅᔨᓂᐊᕐᓗᑎᑦ ᓂᕈᐊᕈᖕᓇᖅᑐᑦ ᐊᑎᖏᓐᓃᒻᒪᖔᖅᐲᑦ, ᐊᐱᕆᓗᒍ ᓄᓇᓕᖕᓂᑦ ᓂᕈᐊᖅᑐᓕᕆᔨᒋᔭᐃᑦ (ᐃᓄᒃ ᐊᐅᓚᑦᑎᖃᑦᑕᖅᑐᖅ ᓂᕈᐊᖅᑐᓕᕆᓂᕐᒥᒃ ᓄᓇᓕᖕᓂᑦ) ᐅᕝᕙᓘᓐᓃᑦ, ᖃᐅᔨᒋᐊᕐᕕᒋᓗᒋᑦ ᓄᓇᕗᒻᒥ ᓂᕈᐊᖅᑐᓕᕆᔨᒃᑯᑦ:

  • 645-4610 (ᑲᖏᖅᖠᓂᖅ) ᐅᕝᕙᓘᓐᓃᑦ 1-800-267-4394 (ᐊᑭᖃᙱᑦᑐᖅ ᑲᓇᑕᒥᑦ)
  • info@elections.nu.ca

ᖃᓄᖅ ᓂᕈᐊᕈᖕᓇᖅᑐᑦ ᐊᑎᖏᓐᓄᐊᕋᔭᖅᐳᖓ?

ᒪᕐᕉᒃ ᐊᑐᕈᖕᓇᖅᑕᑎᑦ ᓂᕈᐊᕈᖕᓇᖅᑐᑦ ᐊᑎᖏᓐᓄᐊᕐᓂᐊᕐᓗᑎᑦ:

  1. ᑕᑕᑎᕐᓗᒍ ᓂᕈᐊᕈᖕᓇᖅᑐᑦ ᐊᑎᖏᓐᓄᐊᕐᓂᐊᕐᓗᓂ ᑕᑕᑎᕆᐊᓕᒃ ᖃᕆᑕᐅᔭᒃᑯᑦ ᐊᑐᕐᓗᒍ ᓂᕈᐊᕈᖕᓇᖅᑐᑦ ᐊᑎᖏᓐᓄᑦ ᐊᑎᓕᐅᕆᕝᕕᒃ.
  2. ᑕᑕᑎᕐᓗᒍ ᓂᕈᐊᕈᖕᓇᖅᑐᑦ ᐊᑎᖏᓐᓄᑦ ᐊᑎᓕᐅᕐᕕᒃ ᑕᑕᑎᕆᐊᓕᒃ ᖃᕆᑕᐅᔭᒃᑯᑦ ᑕᑯᔭᐅᒋᐊᕐᕕᒃᑯᑦ.  ᐊᓕᓚᔪᒧᐊᕐᓗᒍ, ᐊᑎᓕᐅᕐᓗᒍ ᐊᒻᒪᓗ ᖃᕆᑕᐅᔭᒃᑯᑦ ᑎᑎᖅᑲᑎᒍᑦ ᐊᐅᓪᓚᖅᑎᓪᓗᒍ ᐃᓚᐅᓗᒋᑦ ᒪᕐᕉᒃ ᐃᓕᖕᓄᑦ ᑭᓇᐅᓂᕐᓄᑦ ᓇᓗᓇᐃᒃᑯᑏᒃ.
  3. ᑕᑕᑎᕆᓗᑎᑦ ᓂᕈᐊᕆᐊᖅᑐᕈᕕᑦ.  ᓇᓗᓇᐃᒃᑯᑕᕐᒥᒃ ᑕᑯᑎᑦᑎᔭᕆᐊᖃᑐᐃᓐᓇᕆᐊᖃᖅᑐᑎᑦ.

ᐊᓯᐊᖑᕐᓃᑦ ᐊᒻᒪᓗ ᐋᕿᒋᐊᖅᓯᓃᑦ

ᐊᓯᐊᖑᖅᓯᓂᐊᕐᓗᑎᑦ ᐋᕿᒋᐊᖅᓯᓗᓂᓘᓐᓃᑦ ᐃᓕᖕᓅᖓᔪᓂᒃ ᑐᑭᓯᐅᒪᔾᔪᑎᓂᒃ ᓂᕈᐊᕈᖕᓇᖅᑐᑦ ᐊᑎᖏᓐᓃᑦᑐᓂᒃ: