ᓄᕙᒡᔪᐊᕐᓇᖅ-19 ᐊᒃᑐᖅᓯᓂᖃᕐᓂᐊᖅᑐᖅ ᐊᐅᓚᑦᑎᓂᕆᔭᑉᑎᖕᓂᑦ ᐅᑭᐅᓖᑦ (ᐅᒃᑑᐱᕆ) 25, 2021-ᒥᑦ ᑭᑐᓗᒃᑖᓂᒃ ᓂᕈᐊᖅᑎᑦᑎᓂᕐᒥᑦ.

ᐱᓕᕆᖃᑎᒋᔭᕗᑦ ᐊᖓᔪᖅᑳᖅ ᐃᓄᓗᒃᑖᓂᒃ ᐋᓐᓂᐊᖃᖅᑕᐃᓕᒪᔪᓕᕆᔨ ᓄᓇᓕᕗᑦ ᐃᓚᐅᖃᑕᐅᔪᖕᓇᕐᓂᐊᕐᓗᑎᒃ ᒐᕙᒪᖃᕐᓂᕗᑦ ᐅᓗᕆᐊᓇᖅᑐᖃᙱᑦᑐᒦᒻᒫᕐᓗᑕ. ᐅᖃᓕᒫᒃᑲᓐᓂᕆᑦ.

ᑕᑯᒃᑭᑦ ᓄᑖᖑᓛᑦ ᓄᕙᒡᔪᐊᕐᓇᖅ-19−ᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᓪᓗ ᐊᑐᖅᑕᐅᔪᓐᓇᖅᑐᑦ.

ᓂᕈᐊᕐᓂᕐᒧᑦ ᒪᓕᒃᑕᐅᕙᓪᓕᐊᓇᔭᖅᑐᑦ ᓄᕙᒡᔪᐊᖕᓇᖅ−19- ᑕᖃᕐᓂᖓᓂ

ᓱᓇᑦ ᓄᑕᐅᕙᑦ 2021 ᑭᑐᓗᒃᑖᓂᒃ ᓂᕈᐊᖅᑎᑦᑎᓂᕐᒥᑦ?

ᒫᓐᓇᓵᖅ ᐋᖅᑭᒋᐊᖅᓯᓃᑦ ᓄᓇᕗᒻᒥ ᓂᕈᐊᖅᑐᓕᕆᓂᕐᒧᑦ ᐱᖁᔭᕐᒥᑦ ᐋᖅᑭᒃᓯᓚᐅᖅᑐᑦ ᐃᓚᖏᓐᓂᑦ ᐊᓯᐊᙳᖅᑐᓂᒃ ᓂᕈᐊᒍᒃᓴᓄᑦ ᐊᒻᒪᓗ ᓂᕈᐊᖅᑎᓄᑦ 2021 ᑭᑐᓗᒃᑖᓂᒃ ᓂᕈᐊᖅᑎᑦᑎᓂᕐᒥᑦ.

ᓄᓇᓕᖕᒥᑦ ᖃᐅᔨᓴᐅᑎ ᐊᑐᖅᑕᐅᓂᐊᖅᑐᖅ ᓂᕈᐊᕐᓇᐅᑉ ᐅᑉᓗᖓᓂᑦ

  • ᓂᕈᐊᕆᐊᖅᑐᕐᕖᑦ ᐅᒃᑯᐃᖓᓂᐊᓕᖅᑐᑦ 9-ᒥᑦ ᐅᑉᓛᒃᑯᑦ 7-ᒧᑦ ᐅᓐᓂᒃᓴᒃᑯᑦ ᓄᓇᓕᐅᑉ ᖃᐅᔨᓴᐅᑎᖓ ᒪᓕᒡᓗᒍ ᑕᒪᕐᒥᓗᒃᑖᖅ ᑭᒡᒐᖅᑐᖅᑕᐅᕝᕕᖕᓂᑦ.

ᑐᑭᓯᑎᑦᑎᓂᖅ ᓯᕗᓂᒃᓴᒥᑦ ᓂᕈᐊᕈᖕᓇᖅᑐᑦ ᐊᑎᖏᓐᓂᑦ 

  • 16-ᓂᑦ ᐊᒻᒪᓗ 17-ᓂᑦ ᐅᑭᐅᖃᖅᑐᑦ ᐊᑎᓕᐅᕈᖕᓇᖅᓯᔪᑦ ᓂᕈᐊᖃᑕᐅᓂᐊᕐᓗᑎᒃ (ᑭᓯᐊᓂ ᐅᑕᖅᑭᔭᕆᐊᖃᖅᑐᑦ ᓱᓕ 18-ᓂᒃ ᐅᑭᐅᖃᓕᕈᑎᒃ ᓂᕈᐊᕐᓂᐊᕐᓗᑎᒃ).

ᒪᓕᒐᐃᑦ ᕼᐋᒻᓚᒃᑯᑦ ᑲᑎᒪᔨᖏᓐᓄᑦ ᓂᕈᐊᒐᒃᓴᐅᔪᒪᔪᑦ

  • ᒪᐃᔭᐃᑦ ᐊᒻᒪᓗ ᕼᐋᒻᓚᒃᑯᓐᓄᑦ ᑲᑎᒪᔩᑦ ᓂᕈᐊᒐᒃᓴᙳᕈᒪᔪᑦ ᒪᓕᒐᓕᐅᖅᑎᓄᑦ ᓂᕈᐊᖅᑎᑦᑎᓂᕐᒥᑦ ᑲᑎᒪᔨᐅᓂᑎᒃ ᕼᐋᒻᓚᒃᑯᓐᓄᑦ ᓄᖅᑲᐅᑎᔭᕆᐊᖃᖅᑕᖏᑦ.

ᐊᖏᒡᓕᒋᐊᖅᑕᐅᓂᖓ ᑐᐊᕕᓇᖅᑐᒃᑯᑦ ᓂᕈᐊᕐᓂᖅ

  • ᐊᑐᖅᑕᐅᓂᖓ ᑐᐊᕕᓇᖅᑐᒃᑯᑦ ᓂᕈᐊᕐᓂᖅ (ᐅᖃᓘᑎᒃᑯᑦ ᓂᕈᐊᕐᓗᑎᒃ) ᐊᖏᒡᓕᒋᐊᖅᑕᐅᔪᖅ ᓂᕈᐊᕐᓂᖅ ᐊᔪᕐᓂᐊᖅᑐᓄᑦ ᓂᕈᐊᕐᓇᐅᑉ ᐅᑉᓗᖓᓂᑦ ᓂᕆᐅᓇᙱᑦᑐᒃᑯᑦ ᓄᓇᓕᖕᒥᑦ ᐊᐅᓚᕐᒪᑕ.

ᐱᑕᖃᕈᖕᓃᖅᑐᖅ ᓂᕈᐊᕈᔾᔨᓂᖅ

  • ᐊᖏᒡᓕᒋᐊᖅᑕᐅᓂᖓᓄᑦ ᑐᐊᕕᓇᖅᑐᒃᑯᑦ ᓂᕈᐊᕐᓂᖅ, ᑭᓇᑐᐃᓐᓇᖅ ᓂᕈᐊᕋᔭᓚᐅᖅᑐᖅ ᓂᕈᐊᕈᔾᔭᐅᓗᓂ ᑐᐊᕕᓇᖅᑐᒃᑯᑦ ᓂᕈᐊᕈᖕᓇᖅᓯᔪᖅ.  ᓂᕈᐊᕈᔾᔭᐅᓂᖅ ᒪᓂᒪᔾᔮᔪᖕᓃᖅᑐᖅ.

ᑭᒡᓕᖓ ᐊᔾᔨᐅᖏᑦᑐᖅ (ᑎᑎᖅᑲᑎᒎᕆᐊᓕᒃ) ᓂᕈᐊᕈᑎᒧᑦ ᑐᒃᓯᕋᐅᑏᑦ

  • ᓂᕈᐊᕈᑏᑦ ᐱᓕᕆᐊᖑᔪᖕᓇᕐᓂᐊᕐᓗᑎᒃ, ᑎᑭᑎᑕᐅᓗᑎᒃ, ᐊᒻᒪᓗ ᑭᖑᕙᙱᓪᓗᑎᒃ ᐅᑎᖅᑎᑕᐅᓗᑎᒃ, ᑭᒡᓕᒋᔭᐅᔪᖅ ᑐᒃᓯᕋᐅᓯᐅᕐᓗᓂ ᑎᑎᖅᑲᑎᒎᕆᐊᓕᒃ ᓂᕈᐊᕈᑎᒥᑦ 7 ᐅᑉᓘᔪᑦ ᓯᕗᓂᐊᒍᑦ ᓂᕈᐊᕐᓇᐅᑉ ᐅᑉᓗᐊᓂᑦ.

ᐊᑐᙱᑦᑐᖅ ᓈᓴᖅᑕᐅᔭᕆᐊᖃᕐᓂᖓᓄᑦ

  • ᓈᓴᐃᓂᖃᕆᐊᖃᔾᔮᙱᑦᑐᑦ ᓂᕈᐊᒐᒃᓴᖅ ᑮᓇᐅᔭᓂᒃ $500 ᑐᖔᓂᑦ ᑐᓂᕐᕈᓯᐊᓚᐅᕈᓂ ᐊᒻᒪᓗ ᐊᑐᓚᐅᕈᓂ $500 ᑐᖔᓂᑦ ᐱᔫᒥᓵᕆᓂᖓᓐᓂᑦ.

ᑭᒡᓕᐅᔪᖅ ᑲᑎᖦᖢᒋᑦ ᑮᓇᐅᔭᐃᑦ ᖃᐅᔨᒪᓐᓇᙱᑦᑐᓂᒃ ᑐᓂᕐᕈᑕᐅᔪᓄᑦ

  • ᑮᓇᐅᔭᓕᕆ ᐱᖃᑦᑕᕆᐊᖃᙱᑦᑐᖅ ᐅᖓᑖᓅᖅᑐᓂᒃ $2,500 ᑲᑎᖦᖢᒋᑦ ᖃᐅᔨᒪᓐᓇᙱᑦᑐᓂᒃ ᑐᓂᕐᕈᑕᐅᔪᓂᒃ.

ᑐᑭᓯᓇᖅᓯᒋᐊᒃᑲᓐᓂᕐᓗᒍ ᖃᖓᒃᑯᑦ ᑮᓇᐅᔭᓄᑦ ᑐᖅᑯᖅᓯᓯᒪᕝᕕᖕᒥᑦ ᐅᒃᑯᐃᖅᓯᔭᕆᐊᖃᖅᐸᑦ ᑮᓇᐅᔭᓕᕆᔨ

  • ᑮᓇᐅᔭᓕᕆᔨ ᐅᒃᑯᐃᖅᓯᔭᕆᐊᖃᖅᑐᖅ ᑮᓇᐅᔭᓄᑦ ᑐᖅᑯᖅᓯᓯᒪᕝᕕᖕᒥᑦ ᑐᓂᕐᕈᓯᐊᓂᒃ ᐱᖃᑦᑕᓕᖅᑳᖅᑎᓐᓇᒍ, ᐊᒻᒪᓗ ᑭᒡᓕᒋᔭᐅᔪᖅ 21 ᐅᑉᓗᐃᑦ ᓯᕗᓂᐊᒍᑦ ᓂᕈᐊᕐᓇᐅᑉ ᐅᑉᓗᐊᓂᑦ.